Resumen di e Relato Mensual di Juni 2016. 

Desaroyo monetario
Den e luna di Juni 2016, e cantidad di placa den circulacion a subi cu Afl. 126.0 miyon te na Afl. 4.071,2 miyon, compara cu e luna anterior. Esaki a resulta for di un crecemento den activo domestico netto y reserva di divisa netto di, respectivamente, Afl. 109,3 miyon y Afl. 16,7 miyon.  E expansion den e activo domestico netto ta debi na un subida di Afl. 121,8 miyon den credito domestico, cu a wordo parcialmente mitiga pa un caida den transaccionnan no relata na credito di Afl. 12,5 miyon. Credito domestico a crece door di un expansion den credito bancario netto na e sector public y credito na e sector priva di, respectivamente, Afl. 112,1 miyon y Afl. 9,7 miyon. E subida den credito bancario netto na e sector publico ta debi principalmente na un bahada den deposition di gobierno y den Fondo pa Desaroyo di, respectivamente, Afl. 125,0 miyon y Afl. 10,0 miyon. E crecemento den credito bancario na e sector priva a resulta for di mas credito na empresa (+Afl. 6,6 miyon) y hipoteca pa vivienda (+Afl. 4,7 miyon), cual a wordo parcialmente mitiga pa un caida den credito na consumidor (-Afl. 1,8 miyon). E caida den transaccionnan no relata na credito a resulta for di expansionan den otro debenan, e asina yama “shareholders’ equity”, “premises and equipment”, “accounts receivables and prepayments”, y transaccionan di clearing. E expansion den reserva di divisa netto di e sector bancario ta debi na compra netto di divisa di Afl. 180,0 miyon for di publico, principalmente asocia cu entrada for di turismo, transferencia netto for di cuentanan den exterior di companianan local, inversionan directo, y transportacion. E compranan netto di divisa a wordo parcialmente mitiga pa benta netto di divisa di Afl. 163,3 miyon na publico, primordialmente relaciona cu pago pa importacion di mercancia, otro servicionan, otro inversionan, e asina yama “financial derivatives”, transferencianan coriente, e asina yama “income account” y servicionan di gobierno.  

Inflacion
E nivel general di prijs, cu ta wordo midi door di e indice di prijs di consumo, a registra un bahada di 0,8 porciento den e luna di Juni 2016, compara cu Juni 2015. E contribuyentenan principal na e caida aki ta e componente “Vivienda”, cual ta debi primordialmente na un reduccion den prijs di electricidad y e componente “Transporte”, cual ta debi principalmente na un bahada den prijs di gasoline. Di otro banda, e componentenan “Paña y Sapato”, “Cuminda y Bebida no-alcoholico”, “Comunicacion”, “Recreacion y Cultura”, “Restaurant y Hotel” y “Diverso Mercancia y Servicio” a registra un aumento. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,7 porciento compara cu Juni 2015. Pa loke ta trata e promedio anual di e tasa di inflacion, esaki a registra un bahada di 0,6 porciento na Juni 2016 compara cu un bahada di 0,5 porciento na Mei 2016.

Turismo
Na Juni 2016, e cantidad di turista a registra 86.697 bishitante, cual ta 0,9 porciento (-750 bishitante) menos cu na Juni 2015. E caida aki a resulta principalmente door di un bahada den e mercado Latino Americano di 18,7 porciento (-4.735 bishitante), cu a wordo parcialmente mitiga pa un subida den e mercado Norte Americano di 6,0 porciento (+3.168 bishitante). E caida den e mercado Latino Americano tabata primordialmente causa pa un bahada di 36.7 porciento den bishitante for di Venezuela (-6.980 bishitante). E aumento den e mercado Norte Americano a resulta pa gran parti for di un subida di 3.275 bishitante (+6,4 porciento) for di Merca.

E cantidad di turista crucero a crece cu 14,4 porciento (+3.209 bishitante) te na 25.452 na Juni 2016, compara cu Juni 2015. E cantidad di barconan a disminui for di 9 na Juni 2015 pa 7 na Juni 2016.  

Gobierno
Tuma nota cu e cifranan di entrada di gobierno pa luna di Juni 2016 no tabata disponibel na momento di publicacion di e relato aki.

Banco Central di Aruba
11 Augustus 2016

Expresionnan haci den e articulo aki no necesariamente ta refleha opinion di ArenaPoliti.co