Apesar di tin sentimento di satisfaccion. 

E reapertura di e refineria ta trece un sentimento di hopi satisfaccion den Partido MEP. E vision di MEP ta pone e ser humano central.
Lider di Partido MEP ta bisa cu nunca MEP a perde e speranza den e reapertura di e refineria aunke cu e Gobierno actual for di un principio a opta pa desmantelacion.

Sinembargo, Lider di MEP ta laga sa cu su fraccion ta hopi preocupa tambe cu varios aspectonan cu e deal ta trece cu n’e.

Entre otro, e aspecto di medio ambiente pasobra Gobierno deliberadamente no ta bin cu leynan di medio ambiente y consecuentemente den un deal asina nan no ta bay cumpli tampoco cu locual ta e exigencianan importante di medio ambiente.

Un otro aspecto di preocupacion di MEP ta e trahadornan cu ta bay over na e companianan nobo. No tin claridad dicon nan derechonan no ta wordo reconoci. Ta kico e Gobierno aki a negosha anto pa nan?

E preocupacion di mas grandi ta e aspecto financiero. Sr Mike Eman a bisa cu Aruba no ta bay paga ni un cen pa e refineria y cu Aruba no lo bay para garantia p’e refineria tampoco. Pero den e documentonan por mira si un garantia di 300 miyon dolar. Kiermeen tampoco tin claridad ainda kico e aspectonan financiero ta.

“Esakinan ta e puntonan cu mas tin nos preocupa. Y riba e puntonan aki nos lo bay enfoca mas den e siguiente dianan. Nos ta bay sigui investiga esaki y lo bay haci preguntanan hopi critico na Gobierno y mi ta spera cu Gobierno contesta nan tambe cu transparencia y sinceridad”, sra Wever-Croes ta enfatisa.

Poniendo tur cos den balansa, Partido MEP ta di opinion cu tin beneficionan pa habri e refineria bek, Pa bin cu e upgrader aki. Pasoba na final di dia e compromiso di Partido MEP ta cu e tata y mama di famia cu no tin trabou y cu merece un trabou cu un pago husto y biba riba e nivel cu antes nan tabata biba pa asina nan por hiba nan famia padilanti.

Partido MEP tin compromiso cu e pueblo di San Nicolas pa duna nan un bida bek financieramente. Centro di San Nicolas merece di haya un bida bek. Y Partido MEP tin e compromiso pa trece desaroyo economico riba henter nos pais.

“Na fin di dia, nos compromiso ta pa e ser humano cu ta central pa Partido Movimiento Electoral di Pueblo. Y cu e deal aki, cu apesar no ta loke cu nos a pidi cual ta un refineria y loke nos ta haya ta un upgrader y apesar cu nos tin nos preopacionnan, nos ta contento pasobra e ser humano ta bay haya un speranza pa un mihor bida”.

Sra Evelyn Wever-Croes ta termina ta bisa: “Y cu esaki mi kier sigura pueblo, cu den e siguiente dianan aki, nos lo bay sigui traha duro pa haya mas informacion y cuestiona y mira kico nos lo bay haci cu e preocupacionnan cu nos tin. Pa Partido MEP e ser humano ta keda central y cu e speranza cu e mama y tatanan di famia por tin mihor oportunidadnan pa lanta nan yiunan y pa e pueblo di San Nicolas tin mas desaroyo y centro di ciudad por disfruta di mas bida.

Expresionnan haci den e articulo aki no necesariamente ta refleha opinion di ArenaPoliti.co