Nos pueblo ta bibando den angustia, den panico y cu miedo y pami esaki ta inacceptabel. No por ta asina cu nos dushi Aruba a para bira asina aki caminda den tur skina ta sinti e insiguridad. Fin di siman un pareha anciano a wordo atraco y maltrata den nan propio cas caminda atracadornan a cai cu 2000 florin for di nan. Siman ta habri y awor ta empleadonan publico nan bida ta wordo poni na peliger. Un atraco of intent di atraco a tuma lugar na hulpbestuurskantoor Santa Cruz caminda arma di candela a wordo usa y atracadornan a los 4 tiro cu por tawata tin consequencia fatal. Nos pais a bira un wild wild west caminda arma di candela a bira manera cellular. Nos ta lamenta cu nos ta biba den un sociedad caminda criminalidad ta domina. Envez cu gobierno tuma accion y haci algo nan ta bisa pueblo cu ainda awa no a pasa harinja. Kiko mas mester pasa pa minister Dowers y promer minister Mike Eman lanta for di sonjo y cuminsa tuma accion. Sin siguridad NO tin trankilidad.

Nos pueblo kier trankilidad, nos pueblo kier bai drumi anochi sin preocupacion cu nan ta wordo horta of atraca den nan propio cas. Comerciantenan kier siguridad cu nan negoshi no ta wordo horta of atraca. Awor te hasta empleadonan publico mester mas siguridad. Simplemente mi no ta reconce mi pais mas. E ola di criminalidad ta dominando nos pais den momentonan aki. Nos ta sinti cu gobierno mester tuma accion imediato pa por garantiza nos pueblo e trankilidad. Canando den barionan y scuchando e pueblo bo ta sinti e angustia cu e pueblo ta biba aden. Mayoria habitante ta bisa cu nan mester a tuma medida di siguridad pasobra nan no ta sinti nan mes sigur mas den nan propio cas. Sea nan mester a inverti den camera di siguridad, sea de alarma di cas of busca cachonan pa cuida nan cas y nan famia. E situacion ta uno hopi serio y envez cu minister Dowers ta asumi su responsabilidad e ta culpa mundo henter pa su incapacidad pa brinda nos pueblo e trankilidad cu tanto ta boga pe.

Pa dia 13 oktober 2016 comerciantenan a uni, sindicatonan a uni, partidonan politico di opiscion a uni y tur pa un causa husto, nos siguridad. Criminalidad no conoce color politico. . Ora un atracador of un ladrona drenta un cas of un negoshi e NO lo wak di ki color politico bo ta.

Ban hunto como ciudadanonan di e pais aki marcha contra criminalidad 13 OKTOBER saliendo for di Postkantoor na Playa y exigi di gobierno, nos trankilidad.

Expresionnan haci den e articulo aki no necesariamente ta refleha opinion di ArenaPoliti.co