Durante un entrevista Parlamentario, sr. Guillfred Besaril, a duna su opinion riba e ultimo desaroyonan politico na Aruba. Sr. Besaril a declara lo siguiente:

"Normal mi no sa duna mi opinion personal riba incidente- of desaroyonan politico ageno na mi propio Partido. Awe mi ta haci un excepcion comokiera cu ta trata di un desaroyo general cu tin full nos comunidad preocupa. Prome cu tur cos, mi kier a comparti e siguiente pensamento di e atronauta retira, Sr. Chris Hadfield:

"Leadership is not about glorious crowning acts. Ultimately it's about keeping your team together, focused on a goal and motivated to do their best to achieve it. Especially when the stakes are high and the consequences really matter. It's about laying the groundwork for others' success, and then standing back and letting them shine".

Criminalidad y falta di siguridad den nos comunidad a alcansa proporcionnan nunca antes visto. Nos por Papia libremente di un situacion "Out of Control"! Famianan Arubano ta den panico y ta simplemente spera cada dia cu nan no ta e siguiente na turno pa wordo atraca, maltrata of horta. Comercio ta man na cabes cu criminalidad y hasta a yega n'e punto critico den cual operacion di nan negoshinan ta sumamente dificil pa motibo di e falta di siguridad.
Ademas di e criticanan severo den e maneho di Husticia, tin preocupacionnan real den nos Enseñansa.
Tur hende cu kier progresa of kier stimula progreso, ta compronde cu enseñansa ta e yabi pa un miho futuro.
E yabi pa un bienestar sostenibel cu ta real. Pero awe e sector di enseñansa ta confronta tur sorto di reto mane entre otro falta di material, flexibilidad y apoyo profesional. E resultadonan pober di e studiantenan cu a termina e nivel secundario den e ultimo 6 añanan ta papia idioma cla. E cherry riba e bolo pa Pueblo di Aruba ta definitivamente su cuido medico!

AZV a aumenta na dos ocasion den e ultimo 6 aña. Como si fuera poco, Gobierno a bira aumenta e BBO den forma di BAZV.
Sin consulta cu Pueblo y sin cumpli cu nan promesa di elimita BBO. Ta hopi t’e gritonan di disgusto contra e sistema di cuido medico na Aruba. Manera cu toca e tema aki, ta rabia, duele y desepcion ta subi bin laira!
Opinion general: Cuido medico actual ta laga hopi di desea!
Cuanto casonan lamentabel tabata tin e ultimo añanan. Cuanto na situacionan den cual nos ta puntra nos mes "Pakiko mi ta paga anto?" Cuanto hende tin 3 of mas luna ta warda riba specialista? Y con grandi e chens ta cu Gobierno no lo bolbe aumenta e AZV den un futuro cercano? Tur ta preguntanan valido y cu ta describi e frustracion y dolor den Pueblo ora toca e tema di cuido medico general.

Diabierna mainta Aruba a lanta c'un gabinete cu falta un Minister. Esaki ta e segundo biaha den corto tempo c'un Minister, un exponente importante di un vision politico cu a inicia na 2009, ta bandona e barco cu palabranan practicamente idéntico: "Mi no ta reconoce mas e moral y principio den cual e partido ta basa su mes riba dje!" Ademas e ex-Minister ta agrega cu AVP a usa e poder cu Pueblo a presté pa haci y deshaci.
Dos minister di herarqiua importante den partido AVP a bai cu sentimento di decepcion pa un vision bunita riba papel, sinembargo leu di e realidad diario di Pueblo.
Un Presidente di Parlamento ta bira bay laga partido AVP pa motibo di falta na tuma accion concreto den un incidente cu te awe ta un beradero berguensa pa Aruba su Parlamento.
A permiti Hulanda (negligencia) trapa bay den loke t'e nombracion di un Gobernador pa nos Pais y awe Aruba ta sin un Minister Plenipotenciario na Den Haag.
Cada vez nos Pais su comunidad ta wordo bergonza pa sr. Mike Eman. Sino ta core sconde bou palo, ta gritonan brabo na Aruba, te lamento di pushi na Den Haag!

Di berdad ta un conclucion tin den tur loke a bin ta acontece e ultimo dianan.
Un pregunta di cual su respuesta ta contundente: "Cuanto ehempel mas of kico tur mester sigui sucede pa Pueblo realisa cu ta e lider politico di nos Pais, Sr. Mike Eman, a faya Barbaramente? “C'Mon Man!” Ken tur mester sigui "bula afo anto?" Parlamentario Besaril. 

Expresionnan haci den e articulo aki no necesariamente ta refleha opinion di ArenaPoliti.co