Cu atencion riba tur aspecto cu ta hunga un papel den e bienestar di e comunidad Arubano, Gabinete Mike Eman II ta hiba su vision di un pais mas sigur y agradabel pa biba aden, dor di enfoca riba e diferente edificionan rond di nos isla cu ta sea bandona, den mal estado. Nan ta rekeri un atencion sea di parti di e propietarionan of di instancianan publico.

Diaranson mainta Gobierno a duna e comision ya constitui, un caracter permanente pa asina traha plannan riba termino largo cu por garantisa un solucion na e situacion fastioso aki. E comision ta conforma pa e diferente sectornan al caso, como por ehempel DOW, City Inspector y Salubridad Publico. Nan tin un lista di propiedadnan rond di Aruba cu ta trahando riba dje a base di prioridad. E aporte y sosten di ciudadanonan ta bon bini den e meta aki pa medio di contribucion di informacion cu ta valioso den e proceso di cada caso.

Prome Minister Mike Eman ta considera e trabou di e comision aki uno sumamente importante teniendo na cuenta e avancenan grandi cu Gobierno a bin ta haci pa renobacion di centronan di ciudad, como tambe barionan rond di e isla. “Tin bes ta wak cu den un area cu a duna hopi atencion pa renoba, ta keda edificionan cu ta bandona, deteriora y ta para mey mey di tur e area renoba. Esakinan ta kita di e trabou grandi cu ta wordo haci. A ripara cu no ta facil pa yega na drecha of kita e edificio pa construi algo nobo. Pa e motibo ey a dicidi cu pa por atende cu e reto di un forma mas integral, a forma un grupo di trabou,” e mandatario a comenta.

E idea ta pa hunto cu e doñonan di e propiedad, sea drecha of kita. Asina ta habri oportunidad pa traha algo nobo. President di e comision Rubin Ponson, a duna di conoce na salida di e reunion, cu esaki a bay hopi bon. Presente tabata representantenan di Departamento di Obranan Publico, City Inspector, Salubridad Publico, Cuerpo Policial, DIP, Kadaster y Ministerionan di Medio Ambiente, Infrastructura y Asunto General.

“Cada un su aporte ta diferente y valioso. Cuerpo Policial, por ehempel lo mester reenforsa e presencia y ehecucion di otro departamento ora cu ta necesario. Conhuntamente ta aporta informacion y asina tur ta logra yega na lo necesario pa haci e trabou. Tur sinta na mesa, e lo bay mas facil,” asina Ponson a splica. E obhetivo ta pa haya e cooperacion na momento di realisa limpieza di constata edificionan cu ta peliger pa e bisindario. Cada departamento tin hendenan riba caya ta tuma nota di situacionnan potencial.

Tin un lista basta largo cu lo cuminsa traha riba dje, ta bay pone prioridad riba luganan cu no tin dak of muraya cu ta cay den otro, tambe cu a sufri daño di candela y ta forma un mahos bista pa e bisindario y alabes por ta un peliger. Ponson a indica cu e casonan ta reparti tur rond di Aruba. “Den bario di Noord y centro di ciudad, como tambe San Nicolas, a cuminsa caba. Ta spera cu e lista por wordo elimina lo mas pronto posibel,” e funcionario publico a expresa.

Prome Minister Mike Eman ta contento cu e comision ta activo y cu pronto lo elimina un problema mas den e comunidad. Esaki ta detayenan cu den pasado a ignora y keda man crusa pa nan, pero cu e Gobierno aki ta dispuesto pa lora manga y haci algo. E resultado no ta uno directamente palpabel, pero si hopi importante. “Ta mira cada dia cu ta haci progreso cu renobacion di centro di ciudad y barionan y esey ta yuda pa un miho calidad di bida pa e ciudadano; economicamente e ta fortifica e posicion di Aruba como pais bunita, organisa y bon structura,” Premier Eman a splica.

Esnan cu conoce di un caso manera ariba menciona y ta desea pa haci algo cune, por pasa na sede di DOW na Wayaca y puntra pa Rubin Ponson. Tin un formulario pa yena cu e informacion necesario di e edificio, tereno y su propietarionan, prome cu por cuminsa haci e trabounan. Ponson ta admiti cu algun caso en berdad ta dificil pa haya tur informacion, pero cualkier persona cu por yuda ta bon bini.

Expresionnan haci den e articulo aki no necesariamente ta refleha opinion di ArenaPoliti.co