Bo no por papia di integridad si bo no ta papia berdad! Siman pasa e lider di MEP, sra. Evelyn Wever Croes a viola e regla basico aki. Ta pa e motibo aki e presidente di e comision di Asuntonan di Reino di Parlamento di Aruba mester a actua lihe y retira e lider di MEP como representante di Parlamento di Aruba den e comision di integridad. Si e no a haci esey, e presencia di e lider di MEP lo a forma un berguensa pa integridad di Parlamento di Aruba y pa Aruba. E critica riba Parlamento corectamente lo tabata: con boso ta laga un hende cu no ta papia berdad representa Aruba den e comision di integridad. E prome regla di integridad caba e ta viola: e no ta papia berdad. E daño pa reputacion di Aruba y pa Parlamento di Aruba lo tabata grandi.

TRAJECTO PA MAS INTEGRIDAD
Durante di e conferencia di IPKO di siman pasa e delegacion di Aruba a presenta un plan di accion cu ta ensera un trajecto o un programa di ley y areglonan cu mester crea pa yega na un nivel di integridad mas halto den gobernacion di Aruba. Ta bon conoci den tur pais di Reino cu e tema di mehora integridad den gobernacion a cuminsa cu e publicacion di e raport "CALIDAD" na na Aruba na comienso di añanan 90 y e conferencia internacional cu a sigui. Den e periodo di 1994 y despues a introduci un cantidad di ley y areglo cu a contribui na mehora e nivel di integridad y proteha nos pais contra actonan illegal y contra integridad den gobernacion. Den e periodo 2001-2009 (gobernacion di MEP) e meta di hisa nivel di integridad y bon gobernacion a disparce for di mesa. E consecuencia di esaki tabata actonan di "friends and family" inlimita cu a sigui bou di algun minister di e gabinete. E violacion di leynan, enrikesemento di famia y amigonan cu mas di 28 miyon florin di caha di pueblo pa un famia so, tabata e resultado. E raport di WODC cu a laga traha na 2011, a duna un bon refleho di e violacionan di integridad cu a tuma luga den e periodo ey.

E trajecto pa mas integridad den gobernacion di Aruba u a presenta siman pasa, mester ensera  den bista di tur partido den Parlamento di Aruba, cu mester introduci e ley di "financiamiento di partidonan politico", e ley di "screening" di candidatonan pa minister y miembronan di parlamento, e ley pa crea un instituto di Ombudsman na Aruba, un ley pa proteha esnan cu duna informacion riba asuntonan contra integridad, manera corupcion ("Batido di alarma" of "Klokkenluiders") y un "Codico di conducta" cu reglanan pa comportacion di minister y parlamentarionan paden y pafor di parlamento. Mirando cu tur partido ta di acuerdo cu mester introduci tur e areglo y leynan aki, ta spera cu e aña aki majoria di e leynan aki lo pasa den Parlamento. E meta segun fraccion di AVP ta pa preveni cu placa sushi drenta politica na Aruba, pa preveni cu minister y parlamentarionan, awor y den futuro,p haya nan mes den asuntonan illegal of comete actonan contra ley y normanan di nos pais. Pa preveni cu minister y parlamentarionan, awor y den futuro, usa nan funcion pa previligia nan mes of amigo y famianan, manera a sosode bou di gobierno di MEP. Cu otro palabra ta bay pa haci gobernacion di Aruba uno integro na tur nivel y sigura cu e ta "MEP Proof".

Expresionnan haci den e articulo aki no necesariamente ta refleha opinion di ArenaPoliti.co