No solamente Gabinete Mike Eman a crea un desaster riba finansa publico cu lo dura te 2040 pa por yega bek unda nos di MEP a lag’e na 2009, pero Sr. Eman cu su maneho no a crece nos economia, a goberna riba un "Open Check", es decir redobla hasta por papia di triplifica nos debe nacional basa riba consumo y credito sin fin. Tur caminda Gobierno a presta placa na un interes sumamente halto compara cu Hulanda y varios otro pais manera Alemania y Merca. 

Ultimo fin di siman nos pais a haya un yobida di awa cu a laga varios habitante perhudica y tambe varios comerciante den e area di Palm Beach. Na 2004 Orcan Ivan a pasa riba nos isla y e tempo ey Gobierno  di MEP bao guia  di Sr. Nelson Orlando Oduber a percura pa aloca mas di 1 Miyon florin pa nos pueblo por haya cas, muebles, set di sala, stove, frigidaire y wasmachin pa menciona algun. Tambe a acepta ayudo di Hulanda pa drecha edificio di Rode Kruis, cumpra equipo nobo y construi un shelter na Dakota. Asina por wak cu a tuma nos pueblo na serio manera un gobierno responsabel. 

Sr. Eman a anuncia un campaña "Hunto nos ta yuda" na un manera hopi negligente y laga Rode Kruis percura pa e e fondonan wordo aloca pa esunnan den mas necesidad. Un Prome Minister sin consenshi pa nos digno pueblo di Aruba. Si tawata un pais den region di biaha Mike lo a bula riba avion y gasta fondonan publico di nos pais. Riba dje Sr. Eman ta nenga ayudo di Minister Plasterk di Hulanda mirando cu e presupuesto di Aruba ta na werki cu pata pata di debe, pues por a acepta e ayudo aki di Hulanda pa alivia nos pueblo. 

Tur hende ta preocupa pa e manera Aruba ta wordo goberna pa Sr. Eman y su gabinete. No a crea inversionnan, no a trece Foreign Direct Investment pero a endeuda nos pueblo na nivelnan hamas bisto. ATIA, un gremio comercial ta preocupa cu aumento di gasto di salario pasobra comercio ta luchando den un economia cu no ta creciendo. Negoshi chikito y mediano ta luchando den un economia tranca pa 3 aña caba. Hasta Señor Frogs Restaurant a dal cera lagando 30 trahador desampara. Esnan di Aura Casino, esta 44 trahador a perde saco y cangreu. Na Oranjestad, den Caya Betico Croes 42 tienda a cera y 15 mas ta na caminda. Gobierno di AVP ta papia so di gobernacion di MEP pero nan tin 7 aña bayendo pa 8 aña destruyendo nos pais cu e yoradera tempo MEP ta den gobierno. E ta bisto den tur sector di nos pais cu Mike y AVP tin cu bay cas y nunca bin bek. Nos a perde 30 aña di progreso den dos termino di gobernacion. Ta basta cu AVP.

Expresionnan haci den e articulo aki no necesariamente ta refleha opinion di ArenaPoliti.co