Perspectiva Independiente without background 001

Evelyn Wever-Croes (MEP): Ta boga pa cambio pa Parlamento por controla gobierno di berdad

(Tempo pa lesa: 2 - 3 minuut)
Evelyn96 AUDIO

STA CRUZ -- Aruba mester di un cambio den e sistema actual pa nos Parlamento por funciona debidamente. Esaki ta e deseo cu ta biba den henter nos pais.

“Pa logra esaki nos mester kibra e tradicion actual y cambia e leynan existente. Nos pueblo ta anhela pa un biento fresco, pa un cambio, pa democracia wordo realmente sirbi. Nos cuidadanonan kier biba trankil sabiendo cu nan representantenan den Parlamento ta salbaguardia nan interesnan y cu nan ta sigui locual cu pueblo kier, y no locual algun minister dicta.
Nos cuidadanonan cu trese nan preocupacionnan dilanti, merese di haya oido pa e preocupacionnan aki.
Pa logra esaki nos mester trese bek ORDEN y RESPET pa nos Parlamento y pa e institutonan halto di nos pais. Algemene Rekenkamer y Raad van Advies, como colegionan halto di estado mester wordo trata cu respet y Parlamento mester exigi e respet ey.
Pa Parlamento funciona separa di gobierno, nos mester trese cambio den nos leynan y kibra cu e tradicionnan. Con mester haci esey, nos mester sondia ainda, pero tin diferente posibilidad.

DUNA E PARLAMENTARIO AUTORIDAD REAL RIBA E MINISTER
Pa prome mester percura pa e parlamentario tin autoridad real pa e tin algo di bisa e minister. No manera awor cu esnan cu a haya e mayoria di votos ta den gobierno, y esnan cu hopi menos voto ta den parlamento. Pesey un parlamentario awor di AVP nunca por dicidi pa su mes, e no por bisa un minister nada.
Ora un parlamentario di AVP vota diferente of kier actua diferente manera tabata e caso cu sra. Lopez-Tromp, e ta wordo saca cu sla for di partido. Esey mester caba!
Un parlamentario mester controla y cuestiona su gobierno. Ora RvA duna un conseho negativo, e parlamentario mester tin suficiente autoridad pa para firme y bisa NO. Ta asina so nos cuidadanonan por ta trankil.

SEPARA ELECCION DI PARLAMENTO Y DI GOBIERNO
Separa eleccion di parlamento cu esun di gobierno, pa asina esnan cu wordo eligi como parlamentario realmente fungi como parlamentario. Asina nan tin mas autoridad pa controla e gobierno.

POLITICONAN CU MAS VOTO MESTER DRENTA PARLAMENTO
Mester cambia e kiesverordening pa esnan cu mas voto ta esnan cu ta drenta parlamento, asina nan ta sinti un poco mas autoridad pa cuestiona nan gobierno.

Asina tin mas alternativa. Pero nos mester cuminsa cu CAMBIA LEY I KIBRA CU TRADICION, TRESE ORDEN Y RESPET BEK. Ta solamente cu e cambionan asina, nos lo soluciona e problema. Nos cuidadanonan kier por biba trankil, sabiendo cu tin un Parlamento cu realmente ta controla gobierno, y no ta fungi simplemente como un stempelparlement. 
Nos ta cla pa e cambio aki, pasobra e pueblo di Aruba merese mihor, segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.