Parlamentario Guillfred Besaril (MEP): "Maneho ad-hoc di Husticia lo termina ora MEP sinta den gobierno"
ORANJESTAD -- Durante rueda di prensa semanal di partido MEP Parlamentario señor Guillfred Besaril a inicia declarando cu “Den man di partido MEP trahamento ad-hoc den Husticia ta termina”.
Segun Parlamentario Besaril e falta di maneho di e gobierno actual, muy en especial riba e tereno di prevencion, a conduci na e ola di criminalidad inmenso cu tin actualmente. E sistema reactivo di sinta warda te ora algo sosode, pa despues reacciona y core lanta un team pa mira con ta resolve e casonan, no ta e systema pa sigui anda cu e preocupacion den Pueblo pa cu e tema Husticia y Seguridad na Aruba.
Sr. Besaril ta continua bisando cu no ta haciendo uzo eficiente di e agentenan di Cuerpo Policial riba caya.
"Planificacion debido ta keda un problema cronico pa e diferente departamentonan den e cadena hudicial. Pueblo ta sinti hopi falta di e presencia di autoridad riba caya na momento cu tin hopi movecion y actividadnan.
No ta pornada mi a menciona na diferente ocacion cu mester flexibilisa e orario di trabou den e cadena hudicial pa asina e trabou di autoridad ta un respuesta corecto riba e preocupacionnan den nos comunidad.
Nos sociedad su forma di biba a cambia caminda por lo general no tin hende na cas durante dia debi cu contrario na antes, tanto e hende muhe como e hende homber ta traha y cas ta keda bashi te atardi laat.
Tambe ta obvio cu e tipo di criminalidad di awendia no ta igual mas cu esunnan di 40 aña pasa. Sinembargo autoridad si a keda draai su wardanan cu e mesun tipo di orarionan di trabou cu 40 aña pasa.
Ademas di e flexibilisacion di e orario di labor menciona, mi a propone den Staten pa lanta un departamento "Control di Calidad Husticia" cu e tarea principal na keda monitor loke ta biba den nos comunidad pa asina e funcionamento y servicio di autoridad ta mas den liña di loke Pueblo kier mira di nan.
Ta importante pa cambia e enfoke y dedica mas atencion riba prevencion di criminalidad sinembargo tur e cambionan mester cuadra cu e deseo di Pueblo.
Sigui duna espacio na malechornan pa haci y deshaci den nos comunidad no ta un opcion p'ami mas!
Tampoco ta un opcion pa sigui bin Parlamento y duna cifra cuanto caso a wordo resolvi, mientras e cantidad di casonan a keda aumenta cuasando mas dolor y preocupacion den Pueblo.
A bira ora pa haci uzo di tur e recursonan cu Husticia tin na su disponibilidad y modernisa den pensamento di maneho pa asina salvaguardia e siguridad di nos isla" Parlamentario Besaril a termina.
Expresionnan haci den e articulo aki no necesariamente ta refleha opinion di ArenaPoliti.co