Gabinete ME II: Minister Bermudez ta realisa e trayecto presupuestario dentro di e fechanan legal
Pa prome biaha den 30 aña….
Oranjestad – Dialuna merdia a inicia e reunion publico den Parlamento unda cu Minister di Finanzas Angel Bermudez a debati riba tres concepto di ley: cuenta anual 2015, presupuesto supletorio 2016 y cambio den e ley di number di auto.
Pa loke ta trata e cuenta anual di 2015, e mandatario a indica cu e cifranan ta mustra cu e presupuesto 2015 a wordo ehecuta cu un deficit final di 2% GDP. “E resultado aki ta miho cu loke e ley LAft (Landsverordening Aruba tijdelijk financieel Toezicht) mes ta exigi, cu ta 3.7%”, asina Minister Bermudez a splica den Parlamento.
Na mes momento, e di dos concepto tabata tocante un supletorio riba presupuesto di aña 2016, caminda diferente cambio dentro di e presupuesto a wordo proponi y ademas un suma di 5 miyon a wordo aloca pa DOW, pa asina drecha nos infrastructura despues di e dañonan cu e yobida pisa a causa durante luna di November y December. Segun e mandatario e fondonan aki ta keda dentro di e cuadro financiero cu a wordo aproba anteriormente pa e presupuesto 2016.
Pa loke ta trata e cambionan den e ley di number di auto, Minister Bermudez a splica cu esaki ta pa logra tin mas control administrativo riba esunnan cu ainda no ta cumpliendo cu e impuesto aki. Cu e cambionan aki, Departamento di Impuesto lo haya autoridad pa cobra boet na e doño di un vehiculo den caso cu pagonan no wordo haci, segun ley ta stipula.
Na final di e reunion dialuna anochi, tur tres concepto a keda aproba den Parlamento y di e forma aki e mandatario a logra pa prome biaha den 30 aña pa realisa e trayecto presupuestario dentro di e fechanan legal. Pues tanto e presupuesto pa aña 2017, como tambe e cuenta anual di aña pasa, sin laga afo e ahustacionnan di e presupuesto actual cu tambe a keda realisa y aproba.
Expresionnan haci den e articulo aki no necesariamente ta refleha opinion di ArenaPoliti.co