Pone mucha bisti filtermasker na scol no ta un aruba 5 strea! 
Lider di MEP Evelyn Wever-Croes cu a tuma nota di un carta cu rectorado di Colegio San Nicolas a manda pa mayornan den cual ta duna di conoce cu ya pa basta luna tin problema nan serio cu e edificionan di Colegio San Nicolas, y cu minister no ta duna oído na e problemanan. Tambe ta para den e carta cu tin riesgo di asbest, pero cu DTI ainda no a hasi investigación. Pesey rectorado a conseha mayornan pa nan mes tuma medida di precaucion y manda nan yiunan scol cu un mascara dilanti nan boca.

E carta aki a cai manera un bom cerca mayornan, y sigur den fracción di MEP. Pesey lider di MEP, Evelyn Wever-Croes, den nomber di fraccion di MEP a manda preguntanan na e minister pa e duna cuenta kiko e ta hasiendo cu su maneho.
“Nos ta mira regularmente potretnan den corant di e minister cu ta bishita scolnan, pero nos kier mira e minister tuma accion tambe. Bishita y keda sin tuma accion no ta ayuda ningún hende. Manda mayornan bisti nan yiu un masker na scol, no ta contribui na un Aruba di 5 strea. Pero e mas serio di tur esaki ta cu e dirigentenan di scol tin hopi tempo ta urgi gobierno pa atención, pero gobierno no ta duna nan atención. Asina nan por bisa cu nan tin atención pa e hoben? Manda e hoben scol cu filtermasker? Esaki ta inaceptable.
Tambe nos a hasi e minister pregunta tocante e ‘nieuwbouw’, cu a wordo otorga den un destaho publico ya dos luna pasa cu mester brinda alivio na e problemanan di Colegio San Nicolas, pero cu aparentemente no tin placa pa ehecuta. Esaki ta algo stranjo, pasobra gobierno tin placa pa construi cantidad di edificio y caretera, pero no tin placa pa e expansión di e scol aki?
Nos ta spera cu e minister no comete e mesun eror di biaha pasa, di laga otro hende traha comunicado den su nomber, pa e saca su gal. Miho e gasta e placa ey y e energía ey den busca un solución pa e studiantenan y docentenan di Colegio San Nicolas”, líder di MEP a duna di conoce.

Expresionnan haci den e articulo aki no necesariamente ta refleha opinion di ArenaPoliti.co