Fraccion di MEP a dirigi un carta hopi pisa den direccion di presidente di Parlamento pa un biaha mas accentua cu Marisol Lopez-Tromp no sa su trabou. Esaki a keda demostra un biaha mas e siman aki, después cu MEP a pidi pa un reunion publico pa trata e tema di prijs di crudo y prijs di coriente y a exigi pa haya e “hedging agreement” y e “handling fee agreement”. E dos contractnan aki, segun WEB, lo ta e motibo dicon na Aruba ningun hende por haya rebaho di prijs di coriente, y pues MEP a exigi pa mira e contract nan aki. Sinembargo Marisol Lopez-Tromp, actuando en pugna di interesnan di Parlamento, a yama e reunion toch, sin cu e contractnan aki a wordo duna na MEP.

Minister Mike de Meza na e momento ey a indica cu e mester dos pa cuatro siman mas pa caba cu un investigacion, y despues por duna Parlamento e contractnan. A base di esey MEP a pidi pa suspende e reunion pa dos siman, te ora e contractnan ta riba mesa, pasobra e ora por hiba un debate serio y al caso. Sin e contractnan no tin sentido pa sigi cu e debate, pasobra Minister mes a duna di conoce cu e no tin ningun informacion tocante e contractnan, siendo cu nos preguntanan tabata dirigi riba e contractnan cu nos a pidi, pero no a haya ainda.

Pero Marisol Lopez Tromp na forma masha iracional a nenga categorticamente pa suspende e reunion. E tabata ciego y sordo pa argumentonan, te hasta di Baba Herde cu a pidi repetida ves pa suspende e reunion.

Pa colmo el’a para ariba cu segun art 34 Reglamento di Orden ta 3 miembro mester sostene e peticion, y pesey el’a nenga e petición, siendo cu ta 5 parlamentario di MEP a lanta para y pidi pa suspende, y mesora a firma un carta tambe cu 5 firma pa pidi e suspensión di e reunión, pendiente pa haya e contractnan. 5 ta mas cu 3. Esaki ta mustra claramente cu e presidente di parlamento no conoce su trabou. Marisol Lopez-Tromp ta hasiendo demasiado eror como presidente di Parlamento, y no ta busca conseho tampoco. Ningun hende por tum’e na malo, pasobra e no ta hurista, pero si pasobra e no ta busca conseho.

E peticion pa schors e reunion a wordo firma pa 5 parlamentario: Evelyn Wever-Croes, Xiomara Ruiz-Maduro, Glenbert Croes, Chris Romero y Dangui Oduber. Pues cu esaki a cumpli cu art 34 di Reglamento di Orden, y lo tabata micho mas elegante si e presidente di parlamento a suspende e reunión na e momento ey y demostra cu interes di Parlamento ta bai prome cu tur cos.

Gobierno ta falta respet pa Parlamento constantemente nengando di duna informacion, pero e mas lamentable ta cu e Presidente di Parlamento mes ta hunga e wega aki pa permiti Gobierno falta respet pa parlamento.

Nos pueblo merese mihor. Nos pueblo merece un presidente di parlamento cu sa su trabou, pero mas aun, cu ta pone interesnan di PARLAMENTO na prome lugar, y no interesnan personal, manera odio of envidia, of interesnan di gobierno. MEP lo sigi lucha pa asina baha e prijs di coriente, cu presidente di parlamento kier of no.

Expresionnan haci den e articulo aki no necesariamente ta refleha opinion di ArenaPoliti.co