ORANJESTAD – Despues di e conferencia di paisnan LGO cu ta cay bou di e organisacion Association of Overseas Countries and Territories, OCTA, di Union Europeo, por mira atras riba encuentronan fructifero unda e rol lider di Aruba, bou guia di Prome Minister Mike Eman, a resalta.

Cedrick Tilma, kende ta representante di Aruba na Union Europeo, a bisa cu den e proposicion cu Aruba a duna na e islanan LGO, riba e posicion cu mester tuma despues di 2020 ora cu Inglatera no ta forma parti mas di Union Europeo, ta papia di e balor agrega cu e islanan LGO mester tin pa Europa.

E reunion aki a tuma luga siman pasa y a trata pregunta manera: Tin sentido pa e relacion di OCT cu UE ta basa principalmente riba ayudo pa desaroyo, of ta tempo pa un relacion mas fuerte y madura; e partnership aki mester sigui wordo financia via di Fondo di Desaroyo Europeo of tin un forma mas inteligente pa haci esaki, kisas via di e presupuesto regular di UE.

E balor agrega cu e islanan, por ehempel den Caribe, tin pa Europa ta grandi. Nan ta ubica cerca di Continente Americano, cu ta haci nan importante pa comerciantenan Europeo cu kier un laso nobo cu socionan den e area aki, cu mercadonan grandi. “Pues tin oportunidad pa negoshi for di Europa, uzando Aruba como hub. Tur esaki a wordo discuti siman pasa,” Tilma a splica.

Aruba tambe a inspira hopi di e islanan cu e maneho di energia cu e ta ehecutando, unda cu kier logra pa ta totalmente independiente di sistema convencional den e produccion coriente. Tabatin diferente delegacion cu a bishita WEB, planta solar na aeropuerto y parke di molina. “Pa nos huespednan cu a bini for di rond mundo, e bishita tabata algo cu nan por a siña for di dje. Y pa nos tabata un placer pa comparti nos experencianan,” e representante di Aruba na Brussels a bisa.

Expresionnan haci den e articulo aki no necesariamente ta refleha opinion di ArenaPoliti.co