Campaña riba custia di pueblo ta sigui!   

Un biaha mas e pueblo di Noord y specificamente e bario di Boegoeroei mester a soporta fin di siman pasa e presencia di un Prome Minister Mike Eman kende – na lugar di sinta goberna e pais aki den su Cocolishi y wak con pa saca nos pais for di e decadencia y e cataclismo financiero  economico cu el a hinca nos pais aden – a bolbe sali di paranda cu su gang di coordinadornan pa haci show y payasada den bario, esta e acostumbrado “Cuanto vale el show”. Pero ta parce cu e Prome Minister aki a perde tur clase di berguensa y gevoel, ya cu den oranan di trabao el a bay campaña den Noord, hustamente e districto cu el a neglisha completamente durante 8 aña largo. Tabata e momento apropia pa Mike Eman por a mustra cara y despues di 8 aña pidi disculpa na e pueblo di Noord pa boicotia un bunita proyecto di un scol HAVO/VWO pa e districto aki.

Un engaño eterno 
No mester lubida cu na 2009 Gabinete Oduber a laga e proyecto di scol aki completamente cla atras, esta e mapa, bestek, tereno caminda e scol lo ser ubica y finalmente tambe e financiamento. Pero asina cu Mike Eman a drenta gobierno – den su rabia y odio contra e gobierno di MEP – a dicidi di cambia destino di placa di financiamento di e scol aki y a hinca esaki den e proyecto di tram den Oranjestad, cu a resulta un fracaso total. Si Mike Eman tabata tin un tiki aprecio pa e pueblo di Noord, e lo mester a sigui cu e proyecto aki y for di aña pasa caba e pueblo di Noord lo a conoce e prome graduadonan di HAVO/VWO cu lo tabata producto di e scol aki. Alavez no mester lubida con na juni 2012 Mike Eman a declara cu “pronto construccion di e scol MAVO/HAVO/VWO na Montaña lo inicia”. Pero despues di 5 aña su ‘pronto’ a resulta den un engaño eterno!

Diferencia entre MEP y AVP 
Echo ta cu fuera di boicotia e scol HAVO/VWO aki, construi un MFA cu mester wordo paga ainda y a embeyece cierto areanan den Noord, net nada mas a ser haci pa e pueblo aki door di Gabinete Eman. Hopi biaha cierto hendenan den nan ignorancia ta declara cu MEP y AVP ta mescos, ya cu segun nan no tin diferencia entre e dos partidonan aki. Sinembargo echonan concreto ta demostra cu tin un diferencia grandi ora cu MEP goberna y ora cu AVP goberna. Pero tur hende cu sano huicio mes por comproba cu – contrario na Gabinete Eman y AVP cu no a haci practicamente nada pa e districto di Noord – durante e 8 aña di Gabinete Oduber un gran cantidad di proyecto a wordo ehecuta den e districto aki, manera construccion di Compleho Deportivo Frans Figaroa, construccion di Sporthotel, construccion di Warda di Polis na Shaba, construccion di Scol basico na Kudawecha, construccion di Teleshop na Palm Beach, construccion di centro Hadicurari, renobacion y ampliacion di planta di purificacion na Bubali etc. Pues e pueblo di Noord no por wordo manipula pa Mike Eman ya cu nan mes ta mira e diferencia cu a ser hiba den e maneho di e gobierno di MEP y AVP. Ta p’esey mes e recepcion cu Mike Eman y su gang a haya den e pueblo di Boegoeroei tabata hopi pober y ta muestra cu e pueblo di Noord ta rechasa e brasamento y sunchimento di un Prome Ministro kende sin escrupulo kier busca voto den un districto cu el a neglisha completamente. 

Expresionnan haci den e articulo aki no necesariamente ta refleha opinion di ArenaPoliti.co