STA CRUZ -- Den entreevista cu sr Hans Geerman na TOP FM diabierna mainta, lider di MEP a reacciona riba e declaracion di Baba Herde cu AVP ta den shock di e investigacion di corupcion y labamento di placa di minister Paul Croes.

"E unico shock cu AVP por a sinti ta e shock cu nan a wordo gara. Pasobra nan tur tabata sa di esaki di hopi tempo caba. Mas di dos aña pasa ami mes a trese e casonan di corupcion dilanti, pero nan a bari nan for di mesa y bisa cu nos ta gaña. Despues mi colega Dangui Oduber tambe a trese tur esaki padilanti y nan a bolbe bari'e for di mesa. Solo di Pueblo a wordo hiba hues pa rectifica e acusacionnan di corupcion contra e minister, pero e minister a PERDE su caso. Pues tur integrante di AVP tabata sa di e corupcion aki, pero no a hasi nada pa para e corupcion.

Ta mescos cu ta pa malo nan a laga Paul Croes cai den trampa, pa awor crusifik'e. Pasobra mi ta haya hopi straño mes cu e investigacion a cuminsa cu Paul Croes, pasobra Benny Sievinger ta hinca den cosnan hopi mas serio cu Paul Croes. Mi no kier pensa cu AVP a sacrifica Paul Croes pa scapa Benny Sievinger. Esey tempo lo mustra.

Pero en todo caso, ningun parlamentario ni minister di AVP por bisa cu e noticia aki tabata un shock pasobra nan tabata avisa di hopi hopi tempo. E unico cos cu por a shock nan, ta cu nan a wordo gara, pasobra den nan arogancia nan lo a pensa cu nunca nan lo wordo gara", Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co