ORANJESTAD- Rapport preliminar di IMF a keda cla y ta positivo. Minister Richard Arends, encarga cu Asuntonan Economico y Comunicacion, hunto cu Prome Minister Eman y Minister di Finanzas Angel Bermudez  a splica algun detaye di e rapport aki. Pa Minister Arends ta di 4 bes cu e ta atende cu un mision di IMF, prome como consehero y awor como Minister.

"Aruba, como miembro di Reino Hulandes, semper tabata cay bou di e region di Europa occidental y awor pa prome bes ta resorta bou di e region di Caribe. Esaki ta haci e comparacion cu demas paisnan cu economianan similar hopi mas facil. Mi mes tambe a experiencia e mision aki hopi placentero. Nos a hiba discusionnan masha interesante. Ekipo di IMF a comparti modelonan cu nos y a duna nos un palet di costonan den termino economico di cada reforma. IMF a indica cu nos economia a slow down e ultimo tres añanan, dor di turismo y primordialmente turismo di Venezuela cu a cay. Pero, tambe e analistanan indica cu slow down economico aki ta debi na e hecho cu Aruba su deficit a bira menos y ta bayendo den un surplus." Arends a splica cu tur e deficitnan cu gobierno tabatin, bon of malo, ta fondonan cu tabata circula den e economia.

"Un dado momento, ora gobierno ta bay corta gasto, menos e por contribui na actividadnan economico. IMF a indica cu e resultadonan economico di e ultimo tres añanan ta debi na turismo cu a baha y e consolidacion fiscal cu gobierno tabata tuma pa reduci e deficit y debe di pais Aruba, semper manteniendo e balansa." Arends ta masha contento di por anuncia cu IMF tin elogio pa e forma di traha di gobierno y ta premira cu for di e aña aki e actividadnan economico lo mehora. Esaki ta debi no solamente na e proyectonan publico priva cu tin awor aki, pero tambe turismo cu ta lantando cabes bek y mas cu tur reapertura di e refineria.

IMF a indica cu e maneho energetico di Aruba cu tin un componente economico hopi grandi, tambe a yuda pa por a garantisa un crecemento economico. Minister Arends a menciona e critica cu IMF tabatin riba entre otro su ministerio y algun colega. "E ta un critica constante cu ta encera flexibilidacion di e mercado laboral. E redtape cu tin pa establece un negoshi y e gastonan pa haci negoshi aki na Aruba. IMF tambe a ripara durante e discusionnan cu gremionan - dos siman largo di reunion - cu tin señalnan mixto. Tin gremio ta haya cu mester bira mas flexibel y otronan juist no y ta haya e redtape un bon filter y asina tabatin varios opinion y argumentacion. "

Minister Arends a bisa cu loke ta bon ta cu Departamento di Asuntonan Economico por a prueba cu a reduci substancialmente e tempo di espera pa haya un vestigingsvergunning.  "Mi ta hopi satisfecho di e conclusionnan preliminar hopi balansa. Aki un par di luna e rapport final ta keda cla."

Expresionnan haci den e articulo aki no necesariamente ta refleha opinion di ArenaPoliti.co