ORANJESTAD -- Lider di MEP Evelyn Wever-Croes a elabora riba algun aspecto di e vision di MEP pa mehora nos enseñansa.

"Nos ta reitera nos compromiso pa duna docentenan mas voz den decisionnan importante riba e tereno di enseñansa y pa duna nan participacion real. Pasobra ta docentenan sa kiko ta biba den e area di enseñansa y no tin mihor cu nan pa trese e preocupacionnan y solucionnan padilanti.

Una bes cu MEP ta den gobierno nos lo enfoca riba tres area den enseñansa.
E calidad di enseñansa y digitalisacion di enseñansa mester haya mas atencion pa nos garantisa cu nos studiantenan por continua estudionan den exterior sin problema y pa garantisa cu esnan cu bai traha despues di caba scol, por haya trabou sin problema. Den esaki e uso di idioma Papiamento como idioma di instruccion ma klasnan 1-3 tambe ta forma parti.

Di dos area ta e infrastructura di e scolnan. Nos a hasi un inventarisacion caba di estado di tur scol na Aruba y nos tin un dossier traha pa na momento cu MEP drenta den gobierno por pone atencion caminda mester cu prioridad. Nos no mester perde tempo e ora mas pa hasi e estudionan, nos tin nan cla caba.

Y di tres area ta cu mester amplia e ayudo y sosten na docentenan pa asina e docente por encarga su mes mas na duna les y sinti su mes bon hasiendo esey.
Esaki ta nos compromiso pa mehora enseñansa na Aruba. Nos muchanan ta e fundeshi di nos comunidad. Y ta nos deber di duna nan un mihor calidad di enseñansa. Hopi docente cu mi a papia cu nan ta di acuerdo cu esaki y ta dispuesto pa comparti nan vision pa crea e mihor calidad di enseñansa cu ta posibel. Unico cos cu nan kierX ta pa nan wordo scucha, y pa nan tin un participacion REAL. Nos a compromete cu nos si lo duna nan e participacion ey. " lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co