Rene Herdé (AVP): “Nos ta sinti boso dolor”
Aruba, Corsow y Sint Maarten na Saba, Statia y Boneiro:
Sra. Sarah Wescot Williams di St. Maarten a bis’e na ingles: “We feel your pain”. Rene Herdé di e delegacion di Aruba a bisa: “Nos ta sinti Boso dolor. Nos ta reconoce loke Boso ta experienci’a: un negligencia di boso necesidadnan y un falta di oido pa boso grito pa trato husto.” Esaki ta loke e delegacionnan di Aruba, Corsow y Sint Maarten den e reunionnan di IPKO na Hulanda a bisa e delegacionnan di “Eilandsraad” di Saba, Sint Eustatius y Boneiro, diahuebs siman pasa. E reunion di IPKO a tene un encuentro cu e Eilandsraad di e tres islanan di BES pa scucha e situacion na e tres islanan y en especial e discucion cu nan tin cu gobierno di Hulanda riba diferente problema cu tin. Entre e problemanan cu nan tin ta e situacion di e fondonan di pensioen di e islanan, e falta di servicionan medico, e falta di inversion den infrastructura, e pobresa grandi, e falta di mehoracion di enseñansa, e cobramento di belasting dobel na Sint Eustatius y otronan. Un otro tema importante pa e islanan BES ta e proposicion di inclusion di Saba, St. Eustatius y Boneiro den Constitucion Hulandes. E islanan Boneiro, Saba y Sint Eustatius, a aserca parlamentonan di Aruba, Corsow y St. Maarten pa duna nan sosten den nan discucion cu gobierno Hulandes. Den nomber di Parlamento di Aruba, Rene Herdé a expresa cu parlamento di Aruba ta sinti y compronde e preocupacionnan di e tres islanan ruman. A palabra cu ora bolbe Aruba, lo trata e tema aki den Parlamento di Aruba caminda henter e parlamento ta presente. Eynan lo dicidi cua posicion e Parlamento di Aruba lo tuma. Tambe a sigura e miembronan di e delegacionnan di Boneiro, Saba y Sint Eutatius, cu Aruba semper lo ta cla pa traha hunto cu e tres islanan ruman unda cu ta necesario y posibel. Mescos cu a haci den pasado y ta haciendo por ehempel riba terenonan importante di salubridad y enseñansa. Pronto lo yama un reunion di parlamento pa trata e tema aki y tur e otro palabracionnan cu a haci den e reunionnan cu e otro tres paisnan di Reino.
Expresionnan haci den e articulo aki no necesariamente ta refleha opinion di ArenaPoliti.co