Berguensa di uza e palabra “deficit”!  

Awor cu poco poco e fecha di eleccion di 22 di September ta yegando, e partido di gobierno AVP ta haciendo tur intento den e ultimo dianan aki pa sigui manipula mente di pueblo. Mirando cu pueblo ya ta bon consciente caba di e desaster financiero cu nan a crea durante e ultimo 8 añanan, nan a yega na e idea “briyante” pa cuminsa produci nan propio tabelnan cu cifranan financiero mentiroso y manipulativo. Asina e manipuladornan di AVP a haya ta bon pa den nan tabel uza e terminologia “falta of dimas den presupuesto”, na lugar di uza e terminologia “deficit financiero”. Sin duda cu nan tin hopi berguensa mes di uza e palabra “deficit” den nan vocabulario, mirando e desaster cu nan a laga atras riba tereno financiero!

Desaroyo deficit 2002-2016 
Den e tabel cu nan a produci nan a pinta un scenario sumamente negativo pa loke tabata e maneho financiero cu a ser hiba pa Gabinete Oduber durante e periodo di 2001 te cu 2007, caminda nan a goochel cu cifranan di deficit na nan antoho. Partido MEP lo no bay riba e mentira y estupides treci padilanti den e tabel manipulativo aki, pero ta trece na conocemento di pueblo un tabel real caminda por mira e desaroyo di e deficit(surplus) nan financiero durante e periodo di Gabinete Oduber (2002-2009) y di Gabinete Eman (2010-2016). E tabel adhunto ta destila for di e cifranan oficial cu ta aparece den e Annual Statistical Digest 2015 di Banco Central. A base di e cifranan aki dos averahe ta ser presenta, caminda por mira claramente cu durante gobernacion di MEP (Gabinete Oduber)  e averahe di deficit tabata 85 miyon florin den 8 aña. Y e averahe di deficit pa loke ta e gobernacion di AVP (Gabinete Eman), esaki a yega na e suma astronomico di 294 miyon florin den 7 aña. Increibel, pero berdad!

Record deficit na 2012 
Pues por conclui cu partido AVP a masacra nos finansa publico caminda e deficit financiero cu nan a crea den 7 aña ta casi 4 biaha di esun di gobierno di MEP. Pues nada straño cu esaki ta e motibo principal cu nan a logra krak nos debe nacional door di redobla esaki den 8 aña di tempo, yegando te na 86% di nos GDP. Nos tur por corda tambe e record mundial na deficit cu nan a crea na 2012 y 2014 caminda esakinan a surpasa 400 miyon florin na deficit.
Siguramente tur e cifranan oficial aki no ta zona dje bunita ey den orea di e manipuladornan di AVP y ta pesey nan a recori na crea nan propio tabelnan yena di mentira y manipulacion.
Finalmente, e pueblo inteligente cu si ta comprende tur e cifranan aki lo sa di castiga e partido abusado  di AVP den e proximo eleccion.

Expresionnan haci den e articulo aki no necesariamente ta refleha opinion di ArenaPoliti.co