Loke ta un crimen democratico ta ora cu un Pais cu a wordo hinca den un mega debe tin cu sigi paga 4 oportunista over di 60 mil florin pa luna dijes pa nan sali tur siman den medionan di prensa dijes pa lastra hende mientras cu nan productividad den e organo mas halto di Pais Aruba ta nulo.

Si tuma cu e kiesdeler tawata 2752 anto mester dividi esaki den dos pa despues pone 1 acerca pa por defini loke ta bira e voorkeurstemmen. E cifra exacto pa voorkeurstemmen durante e ultimo elecion a resulta di ta 1377. E 4 boca grandinan di AVP hunto apenas ta jega na 1212 votos. Cu otro palabra NAN 4 HUNTO NO TA JEGA na total di 1377(voorkeurstemmen). Ta e tipo di crimenan democratico di e indole aki ta pone cu dia pa dia e status di un Parlamentario ta perde su valor pero si ta keda un prijskaartje halto pa e pagadornan di belasting. Envez cu e cuatro nan aki a hasi nan trabao debidamente door di controla y cuestiona Gabinete Mike Eman I y II, nan ta sali tur dia den e medionan di prensa y comunicacion simplemente pa ataca, insulta y lastra ken cu ta tribi di cuestiona eo pakico awe tin un CFT rapport y un KB riba cabes di Gobierno di Pais Aruba. Pa colmo de los colmos nan 4 a forma parti di e reunion di 6 minuut pa sigi jena nan cartera riba custia di pueblo. Ta e tipo di individuonan asina a danja nomber di loke ta Parlamento y su funcionan. Oportunistanan cu ni sikiera por a saca nan mes cu voorkeurstemmen awe ta defensor di un mega debe ocasiona pa e Ministernan cu a prestanan e stoelnan den Parlamento. Esaki ta loke nos ta considera e crimen democratico mas grandi cu pueblo mester paga pe. Si sinta analisa kico e hendenan aki ta gana annualmente anto e ta bira equivalente na casi 390 trahador den sector priva cu ta cobra e minimum loon unda cu nan si tin cu produci pa e compania bai padilanti y nan si tin cu paga impuestonan pa por sigi cria tipo di hendenan asina! Ta di lamenta cu e structura di nos sistema ta brinda e oportunidad aki y awo a bin resulta cu tin hendenan manera Donny, Melvin, Jeffrey y Clarisca ta dijes saca probecho di e structura door di sinta na un bushalte y warda ki ora Mike Eman ta pasa busca nan pa bai usa nan como marionetanan den Parlamento. Si at least e cuatro nan aki por a hasi e diferencia den por ehempel reunion di presupuesto desde 2010 anto awe nos ta mas cu convenci cu Aruba su debenan ta mucho menos y cu kisas ainda lo tawata tin mihor espacio pa a discuti cu Hulanda promer cu a pone un KB mas tambe hasi un investigacion via CFT. Ta di lamenta cu ta net e cuatro nan aki, cu hunto no ta ni jega na e cifra di loke ta voorkeurstemmen, no a hasi nada den Parlamento pa proteha placa di Pais Aruba. Nan no por a sali na defensa di esnan cu ta paga impuesto pa asina nan por cobra nan salario barbaro mensualmente. Y pa colmo de los colmos ta esnan cu ta papia mas cu tur, ta grita mas cu tur y ta insulta y lastra mas cu tur. Ta keda na pueblo pa educa su mes mas di loke ta e contenido di e trabao di un Parlamentario pa next time scohe mihor. Pueblo mester bira mas consiente cu cada un cu drenta atraves di un free ride ta un peliger pa e Trias Politica paso ta aki ta unda cu e Poder Ehecutivo ta drenta y hasi y deshasi cu e Poder Legislativo. Pais Aruba ta merece mihor Parlamentarionan cu esnan cu ta dijes acudi na conferencianan di prensa di partido pa lesa un opstel of spreekbeurt di e Ministernan. Nan ta suppose di ta cuestiona y controla e Ministernan y e Gabinete den su totalidad, contrario na e mercadeo cu nan mes ta hasi pa cada un di e Ministernan. E costo annual y si bai mira mas den loke ta e periodonan di gobernacion anto sigur nos tur lo para keto y mira con nos a tira casi tres miyon florin afo den solamente 4 individuo cu no tawata tin e decencia di a brinda e protecionan na esnan cu ta paga nan! Esaki ta solamente e cuatro nan aki y ainda falta 8 mas cu tampoco niun di nan por a saca nan mes at least cu e voorkeurstemmen manera cu nos constitucion ta instrui. Si kier papia di crimen serio anto shonnan esaki ta e peor crimen cu ta keda comenti contra Pais Aruba y si 110 mil habitantenan tur santo dia cu e oportunistanan aki ta sinta den e institucion mas halto di Pais Aruba! 

Expresionnan haci den e articulo aki no necesariamente ta refleha opinion di ArenaPoliti.co