UPP a tuma nota di e hecho cu den curso di siman pasa a tuma lugar algo cu por ser considera como un debate organisa pa ATIA y na unda e Lista Combina di PPA/UPP, no a wordo invita. E historia di e preferencia politico exponi pa e miembronan di ATIA den pasado ta conoci. Den pasado ya ATIA a mustra cu nan ta un organisacion cu por ser considera como un tipo di "opleidingsinstituut" pa politiconan cu ta pro-Mal Gobernacion. Diferente presidente a sea bira candidato pa e partido AVP of a bira co-fundador di e partido POR y p'esey nos no a keda asombra cu e acto anti-democratico aki di parti di ATIA, pero si ela yena nos cu indignacion. Ta e mesun ATIA cu, prome cu 2009, a suplica su miembronan pa laga nan trahadornan bay welga y ta e mesun ATIA cu a presta su mes pa den e Dialogo (A-)Social colabora cu e gobierno (AVP/POR) pa masacra e pais aki y nos pueblo Arubano pa 8 aña largo, cu ta tuma un actitud anti-democratico asina.

AVP a briya cu nan ausencia na dos debate y den un otro debate a laga nan fanaticonan haci y deshaci hunto cu e fanaticonan di POR. ATIA enbes di distancia su mes di e actuacion bochornoso asina, a disidi pa recompensa e dos partidonan pa e falta di respet pa nos pueblo votador. Di e forma aki ATIA deliberadamente ta tira un salbabida pa tanto AVP y POR, ya cu ambos partido, hunto cu ATIA ta CULPABEL pa e situacion social, financiero y economico deplorabel na Aruba. Ta tristo pa constata cu ATIA ta keda sin invita e otro partidonan, pero si a haña necesario pa invita POR cu ta un partido cu ta participa pa prome biaha na e eleccion di dia 22 di september. E escohencia ta parce di mester a sosode pa asina cumpli cu e deseo di esnan cu ta sostene y sponsor y cu a yuda funda POR. Cu e actuacion anti-democratico aki ATIA ta priva nos pueblo di conoce tur opcionnan cu tin pa e pueblo por haci un bon escohencia den e proximo eleccion. Cu e actuacion aki ATIA ta haci nan mes culpabel na "KIEZERSBEDROG" Y MANIPULACION di e electorado. 

Ta interesante pa desenmascara ATIA y p'esey PPA/UPP ta curioso pa scucha e "smoesje" cu ATIA lo bay bin cu n'e pa hustifica e actitud anti-transparente y anti-democratico aki. Corda cu nan tin miembro cu ta forma parti di e team di e "spindokters" di AVP/POR. Un di e "smoesje" cu kizas nan lo por bay usa ta cu e otro partido no tin representacion den parlamento, pero e flie ey lo no por subi paso POR tampoco tin representacion actualmente den parlamento. Of POR a wordo invita como e rabo pa e flie subi?? 

Den cuadro di esaki, UPP a manda e directiva di ATIA un carta pa mustra nos indignacion pa nan actitud anti-democratico y nan complicidad na e "KIEZERSBEDROG".
Awor ta na pueblo pa demonstra cu nan ta rechasa e acto anti-democratico aki y duna e partidonan cu no tin representacion den parlamento e apoyo necesario pa por representa nos pueblo dignamente den Parlamento. E motibo ta obvio. Nos NO tin doño, nos ta representa e pueblo. Ta pesey nos ta spera cu e lista combina di PPA/UPP, color caki y nr. 2, haya e sosten aki for di pueblo dia 22 di september.

Ta parce cu ATIA tin miedo cu en todo caso PPA/UPP lo haci su maximo esfuerso pa desemascara nan actitud durante e 8 aña di un gobernacion yena cu manipulacion y corupcion y mustra cuanto miembronan di directiva tin empleadonan den servicio di nan compania cu a haya y a paga pa "ontheffing".


Partido Union Patriotico Progresista
4 di september 2017

Expresionnan haci den e articulo aki no necesariamente ta refleha opinion di ArenaPoliti.co