Pa sigura implementacion di tratadonan di derechonan di mucha. 

Na diferente ocasion partido Pueblo Orguyoso y Respeta (POR) a duna di conoce cu e liña cora cu ta core den henter e plan di gobernacion ta adelanto di e ser humano esta e situacion social. Den e articulo aki kier pone atencion na algun di e mehoracionnan cu POR lo kier introduci den e proximo gobernacion poniendo atencion riba e situacion social di nos hobennan y nos muchanan.

Guia social pa muchanan, adolescentenan y hobennan vulnerabel 
Concretamente nos ta referi akinan na 2 grupo. E prome ta e muchanan y adolescentenan cu ta forma parti di e grupo cu ta core un risico grandi pa bay den mal caminda si nan no haya guia social na tempo. E di segundo grupo ta consisti di hobennan cu tin un strafblad y cu den mayoria di caso no a caba scol secundario y no ta traha. Na e momentonan aki no tin ningun instancia cu ta dunando atencion na e 2 gruponan aki. Pa e segundo grupo mester implementa un trayecto di reintegracion acopla na un guia social cu ta cuminsa ya caba den KIA y ta termina te ora e hoben logra haya un empleo stabil. 

Proteccion di derecho di mucha y introduccion Defensor di Pueblo y di Mucha 
Un defensor di mucha ta necesario pa wordo introduci pa sigura implementacion di tratadonan di derechonan di mucha. Banda di esaki lo reforsa y duna atencion na Voogdijraad pa e por eherece su funcion na un forma mas efectivo, unda e tarea principal ta pa sigura e bienestar di e mucha.

Introducccion y implementacion di Defensor di Pueblo ‘Ombudsman’ y Defensor di Mucha (Kinder Ombudsman) ta di sumo importancia pa pueblo por conta cu un instancia independiente unda e por entrega un keho referente e funcionamento di e servicio di gobierno.

Introduci crèche social 
Casi mita di e esnan cu ta cobra onderstand pa famia (“gezinsuitkering”) ta mama soltera. Teniendo cuenta principalmente cu e grupo aki, lo percura pa famianan cu yiu chikito por haci uzo di centro di cuido di mucha (crèche) di calidad. Lo crea e oportunidad pa mayornan cu ta biba bou di e bestaansminimum, mediante nan dunado di trabou, por aplica pa un toeslag riba nan salario. E dunado di trabou lo por deduci esaki for di su impuesto. Esaki lo contribui cu mas mama (soltera) ta bay subi mercado laboral.

Reforsa posicion di centronan di bario 
Lo reforsa y sostene e posicion di centro di barionan como pilar di convivencia den comunidad. Den cuadro di programanan di trabou comunitario di bario lo reforsa nan posicion di centro di desaroyo y educacion comunitario.

Educacion social 
Den e cuadro aki lo reforsa Multidisciplinair Centrum (MDC) pa por duna mas asistencia na muchanan cu problema di comportacion y ofrece enseñansa na midi. Fuera di esey lo ofrece cursonan con pa traha presupuesto como tambe hermentnan pa forma y educa famia. E cursonan presupuestario lo ta obligatorio pa tur cobrado di onderstand y esunnan di formacion familiar lo ta obligatorio pa tur mama y tata soltero cu ta cobra onderstand. Ademas lo enfoca riba informacion y conscientisacion encuanto abuso di mucha y hende muher, embaraso hubenil y adiccion di droga y alcohol. Y por ultimo lo  conscientisa esnan vulnerabel den nos comunidad di nan derechonan riba sosten social y posibilidadnan di guia social.

Si bo kier haya sa mas informacion di e contenido di nos plan di gobernacion “Vision 17-21 Hunto Nos POR”, esaki ta disponibel riba Facebook Page di POR E Forsa Nobo. Pa motibo cu nos ta consciente cu tin un grupo grandi di persona cu no ta haci uzo di Facebook, a imprimi un version mas cortico di e plan di gobernacion den forma di un corant cu ta wordo reparti den diferente bario. Faltando un poco mas cu dos siman pa eleccion di 22 di september e ta hopi importante pa comunidad ta bon informa di

Expresionnan haci den e articulo aki no necesariamente ta refleha opinion di ArenaPoliti.co