Den un ansha pa critica e maneho financiero, economico y social di gobierno di AVP di e ultimo 5 aña, oposicion ta purba gara na kico cu ta. Haciendo esey oposicion ta mustra atrobe nan intencion berdadero cu pueblo. Durante di e presentacion na Universidad di Aruba diabierna anochi, e miembronan di CFT a splica cu parti grandi di e placa cu gabinete Eman I a usa pa stimula economia a bay na loke nan ta yama “gastonan di consumo” (= consumptieve uitgaven). Cu esey nan kier men cu nan no ta gastonan di inversion den un edificion of un caminda nobo, pero den gastonan cu ta wordo haci pa cumpra cosnan cu ta caba den poco tempo. Esey ta contrario na gastonan cu wordo haci den algo duradero manera un edificio, un cas, un scol, un hospital, un caya, etc. Esakinan ta wordo yama inversion. Aunke e gastonan cu gobierno di AVP a haci ta conoci pa añanan caba, MEP a core sali y grita cu gabinete Eman a haci gastonan robez. Cu e gastonan haci aki ta nifica cu tin cos robez a sosode.

INVERSION FORSA DI COMPRA
For di prome cu eleccion 2009 partido AVP a bisa cu ta hopi cos tin cu haci pa saca nos pais for di e abismo social, economico, financiero y fisico cu MEP a laga Aruba aden. Den e plan di AVP (“ARUBARIBA”) cu a wordo parti den tur bario y tur cas, AVP a bisa cu ta bay stimula nos economia cuminsando den tres forma: 1)baha peso di belasting door di reduci BBO; 2) cuminsa proyectonan cu lo crea trabou y actividad economico; 3) mehora forsa di compra. Un di e gastonan  mas grandi cu CFT ta referi na dje ta e gastonan cu gobierno a haci pa mehora forsa di compra di pueblo. Gabinete Mike Eman a inverti masha hopi placa den indexering di salario di trahadornan cu a wordo nenga pa 7 aña door di MEP; den paga e bevorderingnan cu a keda pega pa 7 aña; den e reparatietoeslag pa pensionadonan di APF y di SVB; den e mehoracion di onderstand; den e ayudo pa mamanan soltera; den e reparatietoeslag pa trahadornan den sector priva.

E definicion economico di ‘gastonan di consumo” ta ensera tambe gastonan colectivo di gobierno den fondonan social manera fondo di pensioen y seguro medico (AZV). E expresion di un di e lidernan maximo di MEP cu e gastonan aki ta robez, ta nifica cu MEP porfin y publicamente ta admiti cu nan tabata y ta contra di e indexering pa trahadornan, contra di e reparatie-toeslag pa pensionadonan y trahadornan den sector priva, cu MEP ta contra di e ‘bevorderingnan” cu trahadornan di gobierno a haya porfin. Con tur esaki a stimula nos economia? Wel si Bo wak cu na Hulanda e gastonan di consumo di gobierno y di ciudadanonan ta forma un 60% di e crecemento economico di e pais, bo por imagina cuanto e ta yuda den economia chikito di Aruba.

“KLINKERS”
Oposicion no tabata contra di indexering, reparatietoeslag y salba fondonan di pensioen so. MEP tabata y ta contra di drecha centronan di ciudad, scolnan y barionan tambe. Corda e campaña di MEP contra di pone klinkers den barionan? Nos conclusion ta cu MEP ta contra di tur cos! Pa colmo awor nan mes ta reconoce sin realisa esey. Di berdad cu “pisca ta muri pa su boca.”

Expresionnan haci den e articulo aki no necesariamente ta refleha opinion di ArenaPoliti.co