Diabierna ultimo lider di MEP Evelyn Wever-Croes a reuni cu e presidente di CFT sr. Age Bakker, y demas miembronan, pa un reunion orientativo. Durante e reunion CFT a splica con nan ta opera na Corsou y Sint Maarten desde 10-10-10, y cu nan a trese cierto orden den e situacion financiero di e paisnan ey. E debe di ambos pais ta bou di 40%, di Aruba ta riba 80%, y ambos pais no tin deficit grandi mas. A base di esey ambos pais por fia na interesnan di menos di 2%, siendo cu Aruba ta fiando na interes di riba 10%, segun CFT. Na Corsou y Sint Maarten CFT ta duna conseho riba e raportnan cada kwartaal di gobierno na Parlamento, pa avisa Parlamento na tempo si cosnan ta bayendo bon of no.

Sr. Bakker a indica cu minister Bermudez a invita CFT pa hasi e investigacion riba e presupuesto 2015, el’a enfatisa cu nan ta independiente y no ta permiti politica inflitra den nan rapport, algo cu e fraccion di AVP ta sigi cuestiona.

El’a indica tambe cu e ta lamenta cu aki na Aruba a scohe pa hiba e debate riba CFT riba e tereno politico, acusando CFT di no tin autoridad, en bes di sinta y debati riba e problema REAL: finansas publico di nos pais!

Sr. Bakker a informa cu CFT no tin un base legal na Aruba ainda, pasobra ta riba nivel di gobierno esey mester wordo discuti. Nan no ta mete den esey. Nan ta hopi preocupa cu e situacion financiero di Aruba. E simple hecho cu e debe nacional a redobla den 5 anja ta motibo pa hopi preocupacion. Na anja 2008 e debe tabata na 40% di GDP, awe e ta riba 80% di GDP, y esaki ta na abismo di bacarota financiero. Ademas, sr. Bakker a enfatisa cu e decision di gobierno di Aruba pa fia asina tanto placa pa paga su gastonan coriente tabata e peor decision cu por a wordo tuma, mirando cu esaki ta contra e asina yama “regla di oro” den finanzas publico: bo por presta placa pa proyecto, pero hamas presta placa pa cubri bo gastonan. Esaki lo crea mas y mas problema, y esey nos ta wak cu a pasa na Aruba tambe.

Sr. Bakker a indica cu e cooperacion cu CFT ta hayando di e departamentonan di gobierno ta bon, y ta satisfecho cu Minister Bermudez a sinti suficiente confiansa pa asina e mes pidi CFT pa hasi e investigacion.

Evelyn Wever-Croes a gradisi CFT pa tuma tempo pa e reunion y duna asina tanto informacion. Lider di MEP ta lamenta e negativismo cu especialmente líder di fracción di AVP sr. Rene Herde a demostra durante e reunión aki, demostrando claramente cu AVP no kier somete su mes na ningún forma di control, y cu AVP kier djis sigi hasi y deshasi. “Mi ta lamenta si cu cos mester a bai asina leew, cu e gobierno di AVP a causa un desastre financiero y awor nos mester papia di supervision. MEP ta di opinión cu nos mes mester por atende cu nos asuntonan. Ta pasobra nos a neglisha, otronan mester a bin pa drecha cos! Den e sigiente dianan lo duna mas informacion tocante e reunion aki” lider di MEP Evelyn Wever-Croes a duna di conoce. 

Expresionnan haci den e articulo aki no necesariamente ta refleha opinion di ArenaPoliti.co