Algun siman pasa mi a publica un articulo na unda cronologicamente mi a mustra con structuralmente tanto Minister Schwengle como Frensel Giel tabata gaña y manipula cu cifranan encuanto renobacion di e salanan di operacion na hospital. Na Ingles tin un dicho cu den mi concepto ta describi exactamente e actitud mediocre y infantil di entre otro e director di AIB Frensel Giel: "when the sh*t hits the fan, some guys run and some guys stay".

Den curso di e siman cu a pasa, mi a wordo acerca door di TOPA cu e informacion cu den un reunion cu APFA, sr. Frensel Giel, cu tambe tabata presente, lo a duna nan dos documento cu tin di haber cu e proyecto di ehecucion di un hospital nobo durante e periodo cu ami tabata encarga cu Salubridad. Sr. Giel lo a conseha Topa pa puntra mi persona pa reacciona y alabes Giel lo a bisa nan cu e lo no reacciona riba mi acusacionnan pasobra e tin un "geheimhoudingsplicht". Esaki na Papiamento crioyo nos ta yama" tira piedra sconde man", pasobra Giel di un banda ta declara di no lo reacciona riba mi acusacionnan y cu e tin "geheimhoudingsplicht", pero di otro banda SÍ e ta haya corecto pa "divulga" documentonan cu den su concepto ta comprometedor pa mi persona.

Ta hopi remarcabel cu Giel ta purba di hustifica nan accionnan, cu ami ta cualifica como CORUPCION, door di bisa cu tin un rapport di 2002 di sr. Jossy Lacle. E rapport cu sr. Giel ta referi na dje, ta un investigacion cu sr. Jossy Lacle a haci encuanto realisacion di un hospital nobo na Aruba. Den pasado caba mi a yega di papia riba e documento aki, cu by the way, mi mes a institui. Y e tempo ey caba mi a bisa cu mi lo pone esaki un banda pasobra e comision den mi concepto tabata completamente "biased", y cu na cierto momento tabata compara "appel cu peer" y mi a laga traha un contra-rapport cu a subraya mi pensamentonan.

Loke ta mas remarcabel ainda, ta e hecho cu despues di 5 aña (esta na 2007) Giel ta traha un notitie riba construccion di un hospital nobo. Den e conseho aki Giel ta expone enfaticamente cu un hospital nobo mester wordo construi na un otro sitio, pasobra e sitio actual di Horacio Oduber Hospital no lo tabata adecuado. Y bin cu un "cheap-shot" awor cu tin un rapport di 2002 cu ta bisa otro, ta pone mi bira mas sigur cu tin corupcion na gran escala den e projecto di HOH.

E actitud aki di "yo no fui" di Giel, no ta nada nobo. Nos conoce su actitud den e proyecto di dump, na unda AIB/FDA tabata full na altura for di cuminzamento di henter e procedura al respecto, pero ora cu gobierno a cambia, diripiente ta bira nan cara den otro direccion. Siendo cu ta nan a aproba y financia e proyecto. Si tin corupcion den e proyecto aki, ta e hendenan den AIB/FDA lo ta hinca aden.

Ta p’esey mi ta spera cu bin un "feitenonderzoek" riba e proyecto aki pa mira cu si Giel ta bay papia of no. Ya cu ela papia di cosnan cu segun e mi lo mester splica cu e no por splica pa motibo di su "geheimhoudingsplicht", mi ta autorise cu e mag di papia tur cos cu a socede tempo cu ami tabata minister cu a haci e proyecto di Imsan y Dump. Ya cu Giel tabata tin e hombresa di bisa Topa cu mi mester responde riba e rapport di 2002, mi ta spera cu e no "chicken-out" awor!! "Be a man, not a cacarouche"!!

Alabes Giel a bisa Topa cu Bussman no a wordo considera pasobra nan tabata laat cu nan datonan technico. Pero no ta mesun Giel aki, a nenga CATEGORICAMENTE cu NO tin un otro oferta?? Laat? Ma no ta na mei 2014 caba Bussman a duna un presentacion na Miami na unda TUR stakeholder tabata presente? Di basta dia caba mi tin e presentacion di Bussman den mi poder y pa desbarata y desenmascara Giel, mi lo facilita prensa cq pueblo copia di esaki. Den e presentacion Bussmann detayadamente a splica kiko lo por ser haci y cuanto tempo y cuanto placa e lo sali. Nan a duna 7 opcion y segun mi informacion opcion 6 tabata esun mihor pa Aruba. Mi tin e presentacion di Bermello di januari 2015 tambe cu hopi menos detaye cu esun di Bussman. Pues otro prueba cu cueste loke cueste Arrellano mester haya e trabow.

Den su presentacion di diabierna dia 20 di maart 2015, Bermello a presenta su oferta mas detaya y eyden e prijs NO tabata 15 miyon dolar manera presenta na januari 2015. NO, esaki tabata un paar di miyon mas. Dicon Giel no a bisa Topa esey?? Aki si su "geheimhoudingsplicht" ta conta, pero pa e rapport di 2002 y e rapport di Bussman, si esey no ta conta.

Remarcabel ta tambe cu den medionan di comunicacion Schwengle tambe ta haci mencion di e reunion cu tabata tin di e stakeholdernan, y ta bisa cu e proyecto di OK pa HOH lo bay costa mas o menos 10 miyon dolar, siendo cu e sa cu e prijs cu a ser duna ta hopi mas cu esey. Dicon un biaha mas ta gaña??

Awor cu Giel ta bisa cu e no ta reacciona riba mi acusacionnan serio riba e corupcionnan cu a y ta tumando lugar den e proyecto di HOH, pero sí ta bisa casi tur cos den un reunion cu Topa, e no por bay sconde mas manera un cobarde tras di su supuesto "geheimhoudingsplicht".

P'esey mi ta reta tanto Schwengle como Giel pa un debate publico na un radiostation local y tv pa mi trece tur documentonan cu mi tin, pa mustra pueblo cu ta un set di manipuladornan tin meti den e proyecto di HOH.
Pueblo tin derecho di sa tur e berdad pasobra na final di dia ta nos pueblo mester bay paga pa un proyecto pata pata di corupcion.
     

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, maart 29, 2015

Expresionnan haci den e articulo aki no necesariamente ta refleha opinion di ArenaPoliti.co