ORANJESTAD/PANAMA CITY – Di biaha despues di e Cumbre de las Americas a cuminsa na Panama un conferencia y tradeshow grandi cu enfoke riba e industria maritimo. E conferencia aki ta atrae delegadonan di tur continente, kende ta buscando partnernan interesante pa haci negoshi cu nan. Reino Hulandes tin un asina yama Paviljoen na e conferencia aki, unda cu diferente reunion a tuma lugar, incluyendo sesionnan di matchmaking pa duna asina companianan di Reino Hulandes oportunidad pa explora nan oportunidadnan di haci negoshi cu otro companianan Panameño of di otro pais.

Prome Minister Mike Eman, kende a acepta e cargo di ta lider di e delegacion pa Reino Hulandes a efectua apertura di e dos dianan dedica na matchmaking. El a gradici e embahador di Reino na Panama sr. Wiebe de Boer y su team pa a organisa e sesionnan y tur loke ta trata e participacion di Reino na e conferencia.

Eman a expresa cu e ta spera cu for di e dialogonan tumando luga lo sali resultadonan fructifero pa tur partner.

El a menciona cu durante e Cumbre de las Americas loke a resalta ta cu hopi di e paisnan ta buscando modelonan economico nobo cu ta combina prosperidad cu equidad. Eman a bisa cu nan tabata enfoca no solamente riba resultadonan financiero, pero tambe riba sostenibilidad di e resultadonan y equidad di e resultadonan pa asina logra beneficionan di e desaroyonan pa un tempo masha largo.

El a desea tur participante na e matchmaking hopi exito, cu e actitud di sostenibilidad prevalece den nan buskeda di partnernan durante di e sesionnan y cu nan por tin bon resultado.

Expresionnan haci den e articulo aki no necesariamente ta refleha opinion di ArenaPoliti.co