Premier Eman “Nos ta sumamente contento cu e perspectivanan nobo di relacion entre Aruba y Hulanda” 

ORANJESTAD- Diaranzon Conseho di Minister di Reino a trata finanzas di pais Aruba. Minister Plenipotenciario Alfonso Boekhoudt a atende e reunion aki y den oranan tempran di mainta Prome Minister Eman tabatin contacto cu ne riba e decision importante cu a wordo tuma. Durante e reunion ey e AMvR a wordo kita for di mesa y na su lugar a pone e acuerdo nobo como punto central con Aruba y Hulanda ta sigui padilanti pa loke ta finanzas di pais Aruba.

Premier Eman ta satisfecho cu e noticia aki. “Tabatin un relato di Minister Plasterk riba e palabracionnan cu a wordo haci cu Aruba. Palabracionnan cu a tuma un buelta positivo, sigur despues di e encuentro cu mi tabatin cu Premier Rutte na Panama.” Eman a splica cu eynan nan a haya oportunidad pa prome bes papia riba e tema ‘finanzas publico’ di Aruba y e perspectiva di Aruba pa loke ta e caminda pa cana y Hulanda na otro banda cu un otro perspectiva. Riba e tema aki e dos partidonan tabatin un punto di bista bastante diferente di otro. Algo su sigur a hunga un rol aki ta e escogencia di austeridad di Hulanda den e periodo di crisis, mientras cu gobierno di Aruba den e periodo di crisis hereda a scoge pa stimula economia y poder di compra. “Esaki na cierto momento a crea un situacion basta tenso cu aña pasa a ocasiona un crisis constitucional. Despues a sigui varios momentonan di dialogo sea telefonico of personal, manera na New York. Tur a bay hopi lihe y na Panama pa prome bes – saliendo hunto representando Reino Hulandes den e forma uni manera nos nos a haci’e –  mi colega Rutte y ami  a haya oportunidad pa papia en extenso na diferente ocasion riba e tema specifico cu ta e vision di Aruba y con Hulanda ta mir’e. Na final di tur e encuentronan fraternal y di un amistad personal, cu ta importante den e desaroyonan di confiansa entre e dos paisnan, tabatin oportunidad pa splica con ta mira e situacion y e realidad cu cada un di nos ta biba aden. Eynan a pone e base di confiansa y ora Minister President Rutte a bay bek Hulanda el a bisa den Conseho di Minister di Reino cu ta ‘hou aan’ e AMvR y a pidi Plasterk, kende a bin Aruba cu Pareha Real, pa habri deliberacionnan di nobo cu Aruba. Esaki cu e meta pa yega na un solucion cu Aruba y Hulanda por biba cune. Sigur no un solucion impone. Esaki a pone un base hopi solido pa e combersacionnan cu a tuma lugar algun siman atras.”

Premier Eman a sigui splica cu a yega na un acuerdo cu Minister Plasterk y su delegacion. Ta a base di e acuerdo ey tambe cu diaranzon ultimo Conseho di Minister di Reino a kita e AMvR for di mesa. Na mes momento a presenta e perspectivanan nobo di e relacionnan entre Aruba y Hulanda. Eman: “Nos ta sumamente contento cu esaki pasobra e bon relacion cu Reino tabata un di e temaman crucial cu a wordo poni na inicio na e gobernacion nobo di fin di 2009. Un relacion cu tabata fractura y bou hopi tension di conflictonan te cu KLM a bandona Aruba. Nos tabatin un trabou grandi pa haci y a yega asina leu cu Aruba tabata wordo mira como un pais modelo den Reino cu un vision hopi cla con drecha e relacionnan den Reino y kico ta e balor adicional di Reino pa loke ta un hub pa Aruba. Awe Aruba tin un Schiphol Group activo, mescos KLM, TNO, Rietveld Academie, Port of Amsterdam y Scheepvaart School Rotterdam cu ta iniciando su programanan na Aruba y Arbor Unie. Tur esaki ta productonan di e vision nobo y bon relacion cu nos a desaroya.”

Eman a bisa cu e ta ultimo persona cu por tabata contento cu e situacion tenso cu a presenta entre Aruba y Hulanda. Sigur despues di a traha asina duro pa mehora e relacion cu Reino. “Mi a haya mi mes den un situacion na unda tabata importante pa a marca e liña pa loke ta autonomia di pais Aruba. Nos a hinca hopi esfuerso pa yega na otro. Delegacionnan tabata bay bin y cada pais a duna suficiente di su mes. Esaki a cristalisa den e acuerdo cu a logra y un punto hopi importante a wordo logra dor di kita e AMvR for di mesa y pone e acuerdo nobo como punto central con Aruba y Hulanda ta sigui padilanti pa loke ta finanzas publico di pais Aruba.” 

Expresionnan haci den e articulo aki no necesariamente ta refleha opinion di ArenaPoliti.co