Nos pais ta pasando den su peor momentonan actualmente. Nos debe a yega 4 biyon florin y esaki ta ta 82% di nos GDP. Di cada florin cu nos pais ta produci 82 cent ta bai pa paga debe. Un gobierno irresponsabel a destrui e finanzas publico di nos pais. Den apenas 5 anja a redobla e debe di nos pais y consequentemente a manda nos pais bancarota. Segun Banco Central, contrario na loke gobierno ta informa pueblo e debe di pais Aruba lo sigui subi y yega bandi di 86%.

E gobierno aki a scohe e solucion di mas facil pa saloi di e problema financiero cu nan a hinka nos pais aden. Nan a scohe pa bai castiga pueblo cu medida y laga pueblo paga pa e disaster financiero cu nan a crea y hinka nos paisa den.

Tin solucionan hopi practico y cu por ehecuta facilmente y asina evita mas medida pa pueblo. Nos mester tene bon na cuenta cu gran parti di nos pueblo ta gana salario minimo cu ta 1647 florin. Segun Centraal Bureau Statsistiek un persona mester gana 2034 florin pa luna pa por sobrevivi. E manera cu gobierno ta introduciendo medida, AD HOC sin haci ningun estudio kiko e efectonan lo ta riba e cartera di nos pueblo lo ta devastador. E aumento di BBO cu 1% lo caba cu cartera di nos pueblo y lo haci Aruba aun mas caro. E poder di compra lo bai atras y calidad di bida lo bai conoce un deterorio pasobra placa no ta yega mas.

Nos a haci claculacionan y e 2 ministernan extra ta costa nos pueblo 17 miyon florin. Si gobierno tawata tin e boluntad di reduce e cantidad di ministernan na 7 e aumento di BBO di 1% lo por a wordo evita. Gobierno a haya e oportunidad, dia cu Juan David Yrausquin a tuma su retiro pa reduce e cantidad di ministernan na 8. Sabiendo e situacion cu pais Aruba ta aden toch nan a scohe di bai bek na 9. Otro ehempel con por reduce gastonan di gobierno masha facil. Promer minister Mike Eman y minister di infrastructura Benny Sevinger nan gastonan di personal hunto ta yega 19 miyon florin mienstras ex minister prmer minister Oduber y ex minister di infrastructura hunto nan gastonan di personal a yega 8 miyon florin.

Imaginabo promer minister Mike Eman tin 130 coordinador y Benny Sevinger tin 67 coordinador. Nan dos hunto tin 197 hende riba payroll di gobierno. Esaki ta muestra cu e gobierno aki no ta give a damn cu pueblo.

Aki bo ta wak cu si a mantene e mesun nivel di gastonan di personal di e gobierno anterior e dos ministernan aki so por a scapa pueblo 11 miyon florin. Si a mantene 7 minister y mantene e gastonan di personal di ministernan na e mesun nivel di gobierno anterior gobierno aki por a reduce su gastonan cu 27 miyon florin. Pero e gobierno di Mike Eman aki a demostra cu nan no tin boluntad pa reduci gasto y nan ta sigui fiesta y derocha placa di pueblo. Gobierno tin un bureau BUVO cu ta haci voorlichting en promotie. Ora bo analiza e presupuesto 2015 bo ta wak cu miyones di florin ta bai na gastonan di voorlichting en promotie pa cada minister anto e or abo ta puntra bo mes pakiko tin e departamento BUVO. Si e ministernan tin e boluntad di laga BUVO haci voorlichting en promotie pa nan envez di nan bureau esaki lo reduce e gastonan di gobierno cu miyones di florin.

Asina aki mi lo bai keda trece cantidad di ehempelnan dilanto con gobierno por reduce su gastonan envez di castiga pueblo cu medida. Tin cantidad di solucionan pero gobierno mester tin e boluntad pa haci esakinan y e gobierno aki a demostra incapaz y cu nan no tin e boluntad pa reduci nan gastonan! Castiga pueblo cu medida NO ta solucionan e problemanan financiero cu nan mes a crea! Aruba tin mester di alternative awor aki y no mas MEDIDA!

Expresionnan haci den e articulo aki no necesariamente ta refleha opinion di ArenaPoliti.co