Pueblo di Aruba, mayoria biaha bo ta huzga un asunto of un procedura den cierto forma y consecuentemente bo ta opina of actua den cierto forma tambe. Pero despues di cu bo haya comprondemento total riba e asunto of procedura, bo ta haya bo ta pidi disculpa pa bo expresionnan.

Den caso di mi huzgamento di sr. Eman, mi ta haya mi ta pidi disculpa. Dicon? Pa motibo cu mi a critica e echonan di sr. Eman severamente. Mi a opina cierto cosnan di sr. Eman, cu awor cu mi a haya comprondemento di su caracter y echonan, mi tin cu bisa cu nan no tabata na nan lugar.

Segun mi conclusion, sr. Eman ta un persona cu no a desaroya debidamente  den su mente. A base di su echonan, bo por conclui cu e ta comporta su mes manera un mucha di 5 aña. E tin un “kinder geloof” of un tino di un mucha. No laga su grandura, su educacion ni su mustashi confundi bo. Un mucha di 5 aña, si e no haya su gana e ta sapatia, yora y keda sin come. Sr. Eman no a haci asina? Tambe su persona ta gusta tende storia for di otronan. Esaki manera un mucha di 5 aña, chupando dede riba su cama ora nan ta contando e un storia, prome cu e pega soño.

Ehempelnan di storianan unda su persona ta chupando dede ta di Wubbo Ockels, cu e storia di e boto sostenibel. Con e ta bay crusa oceano y hopi aventura mas. Tambe sponser e team di Sparta di Hulanda cu lo bira campeon di Europa, pero cu a degrada na Hulanda mes. E storianan di sr. Richard Branson di Virgin Airlines tambe a impacta sr. Eman. Esta cu un dia sr. Eman lo biaha den espacio, cu placa di pueblo di Aruba. Mas storia ta esun di Paul Krugman. E storia di fia placa bay goal sin worry cu mayan. Abo lo no tey toch pa mira e dolor ni e sufrimento di e pueblo. P’esey Aruba su debe nacional a wordo duplica den e periodonan di gobernacion di sr. Eman (5 aña). Otro storia cu sr. Eman a kere ta cu Hulanda lo no traicion’e y cu nan lo no kita e autonomía financiero for di Aruba. Pa e KB, sr. Eman kier a mata curpa door di ta consider’e un verkrachting (abuso sexual). Pa e CFT y protocol (cu ta e verkrachting) e mes a entrega y benta curpa abow. El’a kere e storia cu si e drumi banda di Rutte na Panama, Hulanda lo no haci’e nada. Rutte a lanta e mainta despues y a yama Plasterk bis’e pa claba sr. Eman cu e protocol. Otro storia cu sr. Eman fervientemente ta kere aden ta cu si e cana den e barionan, chapi na casnan bashi, corta mata y verf cura, pueblo lo keda gusta su persona. E no ta worry si e hendenan ta sin trabow of no tin cuminda riba mesa (no goberna pero campaña). Otro storia ta cu na 2020 e mester haci Aruba sostenibel sin worry cu e prijs cu Aruba tin cu bay paga pa esaki. Storianan di traha un brug di Colombia pa Aruba y Hulanda, hunto cu e santito Kiko Gomez. Sin worry cuanto droga posiblemente lo trafica via e brug. Storianan di cu Aruba ta bira un hub pa Sur America! Otro storia cu sr. Eman ta kere aden ta cu e pueblo di Aruba ta un pueblo cu ta lubida liher. Sr. Eman a insisti riba e president di Parlamento pa e vota VOOR pa e presupuesto 2015, bisando e president cu e pueblo ta lubida liher y cu nos mester keda na mando. “Pueblo di Aruba ta kere tur cos cu mi conta nan” el’a declara. Loke tambe a yuda mi yega na e conclusion cu sr. Eman, mentalmente y emocionalmente no a desaroya debidamente, ta e expresionnan di su mesun coleganan y ex-coleganan. Manera “Mike tin un creencia di mucha, kinder geloof. E ta kere tur storia. E no por ta bon di cabes. E no ta compronde e asuntonan. Henny mester papia cu ne”.

Si bo analisa su comportacion profundamente, bo tambe lo compronde cu ta asina e caso ta cu sr. Eman. Consecuentemente, bo ta haya bo ta sinti bo mes malo, pasobra e ta igual na un mucha di 5 aña, hinca den un curpa di un hende grandi. Sinta riba su cama ta chupa dede, tendiendo storianan prome cu e bay drumi, bisti den su baby doll, masha cute asina. Sorry sr. Eman, m’a huzga bo robes.

Expresionnan haci den e articulo aki no necesariamente ta refleha opinion di ArenaPoliti.co