Pa basta tempo caba nos di Fraccion di MEP ta pidiendo sr Dammers como Presidente di e Comicion Financiero di Parlamento pa yama Minister Bermudez pa e mandatario bin duna Parlamento un update riba e situacion financiero di nos Pais. Lamentablemente te cu awe e mandatario di Finanzas no a yega Parlamento pa duna cuenta.

Ningun noticia di reforma fiscal
Parlamento no ta hayando informacion kiko ta pasando cu e reforma fiscal. Minister Bermudez den su ultimo encuentro cu e Comicion Financiero a splica cu ta trahando riba un Algemene Bestedings Belasting ABB cu mester drenta na vigor na januari 2016. E ABB aki supuestamente lo mester reamplaza e BBO pa asina por libra di e parti acumulativo di e belasting. Minister Bermudez a keda di manda e concepto di e ley di ABB pa Parlamento na april/mei 2015. Pero Parlamento no a recibi nada. Na su lugar nos ta wak cu Minister Bermudez ta opta pa bay hisa e BAZV na 2 % manera cu e Fraccion di AVP a sugeri den un amienda durante e tratamento di prespuesto 2015. E manera di traha aki ta confuso. Pesey Raad van Advies den su conseho riba e subida di BAZV ta bisa cu Gabinete Eman ta traha ad hoc, cu otro palabra nan ta traha con cu ta.

No sa con ta para cu e supervicion financiero
Otro punto mas cu mester splicacion di parti di Minister Bermudez ta e supervicion financiero di CFT na Aruba. Parlamento no a tende mas di e mandatario kiko ta pasando riba e tereno aki. Ningun ley di CFT of CAFT a yega Parlamento. Nos no a wordo informa kendenan ta e candidatonan cu ta bin na remarca pa bira representante di Aruba den CFT. E protocol di supervicion no a wordo splica. Parlamento a recibi un documento di visualicacion di data di e presupuesto 2015, pero Minister Bermudez no a bin den Comicion Financiero pa e documento aki por wordo discuti debidamente.

Nos no sa con ta paga pa PPP
Minister Sevinger a bin Parlamento pa e proyecto di Green Corridor y no por a mustra di unda Aruba lo saca placa pa paga pa e proyecto PPP aki cuminsando na 2017. Nos a pidi pa Minister Bermudez bin splica Parlamento, pero e mandatario no a yega pa motibo di kebrante di salud. Mientrastanto tin un conseho riba mesa di 26 juni 2015 den cual Departamento di Finanzas ta bisa cu NO tin placa pa paga e proyectonan aki. Riba dje Banco Central ta manda carta dia 29 juni 2015 pa informa cu Infra Team di Minister Sevinger a duna informacion financiero robes. Un chaos total!

No ta duna cara na e choas financiero
Pues nos Pais ta den un chaos financiero y asina mes Minister Bermudez no ta dunando cara ni cuenta na Parlamento riba e situacion financiero di nos Pais. Esaki ta simplemente NO POR!

Xiomara Maduro
30 juni 2015

Expresionnan haci den e articulo aki no necesariamente ta refleha opinion di ArenaPoliti.co