Na nos Pais den e momentonan aki ta reinando un caos danki na e mal gobernacion di Gabinete Eman. E situacion financiero di nos Pais ta caotico y te na e extremo cu Hulanda mester cay aden y pone nos gobierno bou di curatela. Cu palabra y potret bunita ta purba tapa y disimula e caos aki, pero mescos cu bo no por tapa solo cu dede, bo no por tapa e caos cu ta reinando na nos Pais. E motibo ta simpel, Gabinete Eman lidera pa Minister Eman ta gobernando nos Pais di mala fe y esaki ta locual ta perhudicando nos Pueblo grandemente.

No ta papia e berdad
Minister Eman tin problema pa papia e berdad. Cada dia cu pasa mas y mas prueba ta bin dilanti con Minister Eman ta gania e Pueblo di Aruba djies pa yega y keda na poder. Tuma por ehempel BBO. Despues cu Minister Eman a demonisa y culpa BBO pa tur problema di Aruba y hasta pa e ciere di e refineria, awe Minister Eman mes ta subi BBO na 3,5% y aki poco dia lo bolbe hise mas. Un otro prueba ta CFT. Despues cu Minister Eman a bay den welga di hamber, yama Hulanda pa verkrachter y tabata dispuesto hasta pa muri tanten cu Aruba no bay bou supervicion financiero di CFT, ata awe e mesun Minister Eman ta firma protocol pa entrega autonomia y bay bou di curatela di Hulanda por medio di supervicion financiero di CFT. Ta solamente ora bo ta goberna di mala fe, bo ta gania te na e extremo di perhudica bo Pais entregando autonomia cu tanto e Pueblo a lucha pe.

Endueda generacion
Parew cu tur e ganiamento aki, Minister Eman a fiesta cu e placa di Pueblo aki fiando y gastando placa den viahenan y projectonan cu no tin prioridad pa nos Pais, te bay na e extremo di redobla e debe di e Pais aki. E debenan aki no solamente ta perhudica nos Pueblo awor cu medida na granel y un costo di bida haltisimo, pero tambe ta perhudica full un generacion hoben di nos Pais cu ta mira nan posibilidadnan di estudio y un trabou digno bira menos cada dia cu pasa. Un gobernante di buena fe nunca por a hinca den su cabes pa endueda e generacion hoben di e Pais di e forma aki. Ta hende di mala fe so por redobla e debe di su Pais den 4 aña di tempo y pone nan sufri na man di medida pa drecha e desaster di su mal gobernacion.

Minister Eman a faya y mester bay
E falta di sinceridad, e falta di consideracion y e falta di amor di Minster Eman pa e Pueblo aki y su generacion hoben a crea un caos na nos Pais y asina aki nos no por sigi. E ora a yega pa Minister Eman hunto cu su ministernan bandona gobernacion y duna e Pais aki un chens di regenera for di e caos crea pa Gabinete Eman. Minister Eman a faya y awor t’e ora pa e bay.

23 augustus 2015

Expresionnan haci den e articulo aki no necesariamente ta refleha opinion di ArenaPoliti.co