E problema cu tin pa cu reconosemento di diplomanan di HAVO y VWO ya ta tumando demasiado tempo, y e minister no ta mustra ningun interes. Asina lider di MEP Evelyn Wever-Croes a duna di conose. "Ta imposibel cu un hende asina ta bisa cu e tin nos studiantenan na pecho. Colegio Arubano a presenta plan A, pero minister no ta tuma accion. Despues Colegio Arubano a presenta plan B y tampoco minister ta duna oido. Ta dicon e minister aki kier perhudica un grupo grandi di nos hobennan cu ta esnan cu mester bira nos profesionalnan di mayan y guia nos pais. Acaso ta pasobra e no tin yiu cu ta cai den e grupo di studiante aki cu ta core riesgo cu mayan nan diploma no bal nada, ta pesey e no ta worry?

Usualmente ami no ta critica un minister asina fuerte y frontal, sinembargo aki ta trata di hobennan inocente cu ta studianto hopi duro pa nan C.P. y S.O. No ta husto cu nan mester kibra nan cabes si nan diploma lo tin valides si of no. Ami mes tin mas di un luna ta cuestiona minister riba e tema aki, pero e ta ignora tur pregunta, tur remarke y tur critica. Aparentemente e no ta interesa den contesta Parlamento tampoco. Mi ta spera cu e biaha aki si e minister tuma tempo pa contesta nos, of laga e compania di mercadeo cu e ta paga miyones di florin pa skibi articulo p'e, pa contesta nos y asina e studiantenan y e scol tambe haya sa unda nos ta para cu e problema aki", segun lider di MEp Evelyn Wever-Croes