Den conferencia di COPPPAL diasabra lider di MEP Evelyn Wever Croes a trese padilanti e tema di e status politico di Aruba. Den su disertacion, cu a wordo hopi bon ricibi, Wever Croes a pidi atencion pa e hecho cu Aruba a perde su autonomia financiero debi cu e gobierno actual a hiba un mal maneho financiero y pasobra Gobierno di Hulanda a faya den su funcion di garantisa bon gobernacion (waarborg functie).

Wever Croes a recapitula e historia di Statuut di Reino, den cual Nacionnan Uni a alivia Hulanda di raporta anualmente contal cu Hulanda duna su ex colonianan espacio y asistencia pa nan por para mas y mas riba su pia. Sinembargo e diferente protocolnan firma entre gobiernonan di Hulanda y Aruba ultimo anjanan a condusi cu Aruba a perde su autonomia financiero y cu esey ta viola e palabracionnan hasi cu Nacionnan Uni di duna mas autonomia en bes di duna menos.

Wever Croes a bai mas leew y a trese e ponencia dilanti cu mientras nos a perde nos autonomia, e mal gobernacion si a continua y nos debe nacional ta sigi wordo aumenta y segun Wever Croes esey ta ponebo pensa cu aki por ta trata di un plan bon orquestra. Pasobra no ta un secreto cu Hulanda nunca a pordona e lucha di Aruba!

Awor Aruba su caso ta cu Aruba no tin MAS autonomia, sino MENOS autonomia y esey ta pone cu Reino Hulandes ta den violacion cu palabracion cu Nacionnan Uni.

Pa e motibo ey partido MEP a dicidi di cuminsa cana e caminda pa bai Nacionnan Uni y a pidi e conferencia di COPPPAL sosten den e proceso aki. Esnan presente na e conferencia a keda impresiona di e disertacion y a duna tur sosten na MEP.

Cu esaki e prome paso di MEP ta tuma pa gana e autonomia bek cu Aruba a perde debi na mal maneho di gobierno di AVP.

Expresionnan haci den e articulo aki no necesariamente ta refleha opinion di ArenaPoliti.co