Tabata tin delegadonan di Mexico, San Salvador, Republica Dominicana y tambe nos rumannan di Curaçao y Boneiro. Un Conferencia masha bon organisa y cu tabata un exito total. Varios mocion a keda aproba pa nos pueblonan por keda biba den Libertad y cu Dignidad. Tawata un honor pa atende esaki cu ex-Minister di Husticia di Aruba sr. Rudy Croes como Vicepresidente di COPPPAL (Conferencia Permanente de Partidos Politicos de America Latina y el Caribe). Nos lider sra. Evelyn Wever Croes cu varios Parlamentario, Presidente di districto San Nicolas y varios otro invitado. Mi a hiba palabra riba e tema principal cu tawata Migracion den Siglo 21. Mi a recomenda pa Centro y Sur America mester elimina nan ehercito y inverti den Educacion di nan pueblo combina den crece nan Economia pa carga nan pueblo su necesidadnan. Migracion ta algo desde inicio di humanidad pero cu tempo nos a crea fronteranan limitando e fluho di personanan. Ta varios motibo hende ta emigra fo’i nan pais di origen: Pobresa, Discriminacion Racial y Financiero/Economico pa menciona algun. Mi a duna Costa Rica como ehempel cu no tin un ehercito desde 1948 despues di un Guera Civil. Awo e pais aki ta inverti den Infrastructura, Cuido Medico y Enseñansa. E pais tin un GDP per Capita di $7.390, pues e no ta un pais rico pero nan ta riba bon caminda. E poblacion ta 4.5 miyon y e pueblo ta feliz y ta gosa di bon salud. Tambe nos a papia di "Cause & Effect" di Colonialismo cu nos pueblonan a wordo afecta den nan desaroyo anto cu awe nos ta experiencia e partinan negativo di esaki despues di varios siglo. Mi a toca tambe e tema di Igualdad, un bunita palabra pero hopi biaha e ta keda na palabra so. Mi a mustra cu nos tin cu stop cu Neo Colonialismo unda nos ta pasa pa cada generacion cosnan sin sentido y humiyante pa e bida humano. Historia Africano no a cuminsa cu Sclavitud, nos mester stop cu berdadnan na mitar, ban hinca historia den su contexto real. Nos ta papia hopi di 150 aña pasa di sclavitud, un periodo hopi Antihumano y doloroso, pero nos no ta papia di Toussaint Louverture, Jean Jacques Dessalines, Nat Turner y Tula, esta esnan cu a lucha pa nan Libertad y Igualdad. Tambe mi a mustra con Colonialismo a destrui e paz, convivencia y progreso di e pueblonan. Nos por wak esaki den varios pais den Caribe unda Democracia ta limita pa esnan cu no tin nan partido den Gobierno. Constitucion ta papia bunita di Igualdad pero nos ta leu fo’i Igualdad pa varios hende den diferente manera. Mi a mustra con Aruba a hereda atraves di Colonialismo e fiesta di Sinterklaas cu no ta cuadra cu e principio di Igualdad. Pasobra ta mustra claramente cu e ser humano di origen Europeo ta mas cu esnan di origen Africano. E ta algo humiyante cu cada aña mester biba cu ne, esaki den mi opinion politico mester wordo aboli inmediatamente. Esaki ta Politica di Igualdad Racial, anto asina mester ta. Igualdad ta bunita pero e no mester keda na palabra so. Si nos enfoca riba bon Gobernacion, Libertad y Igualdad nos por cambia structuralmente e problemanan den Centro, Sur America y Caribe.
Mi ta termina cu palabranan di President di Costa Rica, Oscar Arias na 1987: "I belong to a small country, "he said, "That was not afraid to abolish its army in order to increase its strength. In my homeland you will not find a single tank, a single artillery piece, a single warship or a single military helicopter. Today we threathen no one, neither our own people nor our neighbors. Such threats are absent not because we lack tanks but because there are few of us who are hungry, illiterate or unemployed."

Expresionnan haci den e articulo aki no necesariamente ta refleha opinion di ArenaPoliti.co