ORANJESTAD – Un acuerdo grandi y clave a sali for di e prome dia di e seis edicion di Green Conference. Ta trata di un proyecto masha innovativo cu ta permiti WEB Aruba N.V. crea depositonan di energia. E socio di nos empresa local di utilidad den e iniciativa aki ta Temporal Power y e idea su tras ta pa crea un sistema di deposito di energy tipo flywheel cu un capacidad di 5 MegaWatt.

E anuncio y firmamento di e acuerdo a tuma luga dilanti di e participantenan di e conferencia y den presencia di Minister di Asuntonan Economico, Energia y Comunicacion, ing. ike de Meza y Director di Utilities Aruba N.V. Firmantenan tabata Director interino di WEB Aruba N.V. ing. Luis Oduber y Eric Murray, President y CEO di Temporal Power Ltd.

E sistema di flywheel ta sigura un flexibilidad y resistencia mas grandi riba e grid, mientras cu na mesun momento ta baha e cantidad di fuel cu mester kima den e proceso di produccion di energia. E proyecto ta parti den dos fase, cada un tin un capacidad di 5 MegaWatt y ta programa pa keda concreta na 2017.

“Den nos empeño pa crea un sociedad sostenibel, e cambio pa un grid completamente renobabel ta un prioridad pa Aruba. Pa cumpli cu e meta aki, nos mester continua cu e pensamento di liderazgo na WEB y tecnologianan innovativo manera e flywheels di Temporal Power,”  Prome Minister Mike Eman a expresa.

Resultadonan beneficioso for di Green Conference ta continua riba diaranson, caminda ta programa lansamento di e Centro pa Excelencia di Nacionnan Uni pa Desaroyo Sostenibel pa SIDS (Small Island Developing States).

Expresionnan haci den e articulo aki no necesariamente ta refleha opinion di ArenaPoliti.co