Fraccion di MEP a pidi un reunion publico cu urgencia cu minister De Meza pa atende e asunto di 12.000 famia cu no por paga nan cuenta di awa.

ORANJESTAD -- Manera ta conoci tin un situacion social na Aruba basta penoso cual lamentablemente no ta hayando atencion di gobierno. Ta asina cu e cantidad di clientenan cu no por paga nan cuenta di awa a crece di 4000 pa 12000 esaki ta 3 biaha! Logicamente esaki ta confirma y ta señal cu costo di bida a aumenta den ultimo 6 anjanan como consequencia di tanto medida cu Gobierno di AVP a bin cun'e, creando problemanan pa cuidadanonan por logra cumpli cu pago di awa y coriente cu ta cai bou necesidadnan basico. E ta ironico cu nos prome minister ta pretende cu e ta combatiendo pobresa siendo cu tipo di noticianan aki ta hustamente confirmando e situacion social crea door di Gabinete Eman. Y ta mas ironico ainda cu Mike Eman ta declara cu e ta orguyoso di tur esaki.

E asunto aki tin Fraccion di MEP hopi preocupa y relaciona cu esaki a pidi un reunion publico cu urgencia cu minister De Meza pa atende e asunto di 12.000 famia cu no por paga nan cuenta di awa. Fraccion di MEP ta spera cu presidente di parlamento por tuma e peticion na serio y jama unreunion publico mas pronto cu ta posibel. Nos mester busca un solucionpa Gobierno yuda e 12.000 hogarnan pa nan no corta nan awa ni e coriente, pero pa yega na areglonan pagable cu e hendenan aki. Nos ta exigi gobierno pone man na su curason y hasi un gesto di solidaridad pa tur e famianan den necesidad. E peticion pa e reunion a wordo hasi diamars mainta y mirando e caracter di urgencia, ta spera cu presidente di parlamento yama e reuion aki liher.

Expresionnan haci den e articulo aki no necesariamente ta refleha opinion di ArenaPoliti.co