Despues cu Gabinete Eman a castiga e clase trahador y pensionadonan durante mas cu 6 aña largo, porfin – awor cu nan ta casi bandona gobernacion – nan a dicidi di aumenta e salario minimo y e pensioen di nos grandinan cu un miserabel 2.5%. resp. 2.37% entrante januari 2016. Na Hulandes nan ta yama esaki “een doekje voor het bloeden”!
Hecho ta cu desde cu Gabinete Eman a sinta na fin di 2009 ta 2 biaha so nan a aumenta e salario minimo, siendo cu bao di Gabinete Oduber esaki a ser aumenta na 7 ocasion den 8 aña di tempo. Colmo de lo colmos ta cu durante casi 7 aña di Gabinete Eman, ni un solo biaha e pensioen di nos grandinan a ser aumenta, siendo cu e aumento di costo di bida durante e ultimo añanan a hinca nos grandinan den problema financiero hopi serio.

Aumento di Salario minimo
Pa haci un comparacion con miserabel Gabinete Eman ta anda cu esnan cu ta cobra salario minimo y nos pensionadonan, den e tabel adhunto por mira e desaroyo di e salario minimo, caminda por mira claramente cu durante Gabinete Oduber, esnan cu tin un salario minimo a bay dilanti cu un averahe di 54 florin pa aña y bao di Gabinete Eman nan a bay dilanti cu un miserabel 19 florin pa aña. Pues den comparacion cu AVP casi tres biaha mas hopi e gobierno social democrata di MEP a percura pa e clase trahador por a biba den un forma mas digno.

Aumento di Pensioen di viehez
Pa loke ta e pensionadonan soltero, durante Gabinete Oduber nan a bay dilanti cu 20 florin pa aña, siendo cu bao di Gabinete Eman nan a bay dilanti cu un miserabel 4 florin pa aña. E pensionadonan casa a bay dilanti cu 33 florin pa aña bao Gabinete Oduber y bao di Gabinete Eman nan a bay dilanti cu solamente 6 florin pa aña. Hecho ta cu si Gabinete Eman tin un maneho un tiki mas humano, nan lo no a exonera un debe cu nan tin na SVB di 60 miyon florin, pero cu e suma aki nan lo por a duna e pensionadonan un aumento un tiki mas razonabel entrante otro aña.
Pues por conclui cu ningun di e integrantenan di AVP mester ta hubilo cu e aumentonan ultimo, ya nan mester tin berguensa cu durante casi 7 aña nan a suta e clase trahador y e pensionadonan cu medida tras di medida, sin cu nan a percura pa duna e gruponan vulnerabel aki un aumento drechi cu nan por biba den forma digno y evita cu nan ta pasa trabao pa sobrevivi e avalancha di medidanan imponi riba nan lomba.

Expresionnan haci den e articulo aki no necesariamente ta refleha opinion di ArenaPoliti.co