Pueblo di Aruba, tin tur indicacion cu aña 2016 lo bay bira e aña di manipulacion espectacular di parti di gobierno di Aruba. Como prome confirmacion di esaki ta e supuesto reduccion di tarifa di coriente di parti di gobierno di Aruba pa e parti domestico di 10%. Den prome instante lo bo mester bira contento di tende esaki. Pero, laga nos analisa e asunto aki di cerca y cu comprondemento pa haya sa si enrealidad nos mester ta contento, si of no.
Uno, cu cuanto porciento gobierno a laga subi e tarifa di coriente ultimo biaha? Un ta cu 15%? Pueblo por corda ainda dia 12 di oktober 2014, tabata tin un manifestacion contra e subida di 15%? Tambe cu gobierno a tira esaki riba lomba di Valero? Sr. Otmar Oduber a declara e tempo ey cu “tanten cu e handling fee di Valero ta existi, e prijs dificilmente lo por varia di loke e ta awor aki conforme ahustacion haci”. Valero lo a baha of kita e handling fee awor si? Asina mes  ainda ta keda un subida di 5% di e tarifa vigente. Dos, awendia e prijs di crudo riba mercado mundial ta alrededor di US$ 37.04 p/b. En comparacion cu e ultimo biaha cu e prijs tabata na e punto mas halto cu tabata na juni 2014, esta US$ 105.86, esaki a BAHA en total cu 65.02%. Si bo tene cuenta cu e 5% cu ainda falta pa kita, gobierno ainda falta pa baha e coriente cu 60.02%. Of no? Pues e 10% aki no ta honestamente ahusta di e parti di gobierno. WEB NV a cobra pueblo di Aruba, Afl. 134.539.694 di mas door di Hedging. Esaki ta pa fin di maart 2015 den boekinan di e propio WEB NV. Coriente y awa lo mester tabata hopi mas abow pa pueblo paga, incluyendo gasolin!! Tres, door di e hedging haci cu permiso di gobierno di Aruba, e prijs di fuel oil entrega na WEB NV no por cambia te cu 2017. Pues, aki gobierno no por haya placa pa cubri e 10% cu WEB NV lo no bay haya mas. WEB NV ta paga pa alrededor di $90 p/b y e prijs ta na $ 37.04. Consecuentemente, e 26 miyon y mas cu WEB NV tabata den rood na banco, lo bai subi considerablemente pa e motibo aki. WEB NV lo bay sufri un golpi financiero hopi duro, cual golpi probablemente sr. Eman a planea caba pa sconde, cu lo mester bay wordo financia door di e banco local cu ta financiando gobierno di AVP, pa mas cu 285 miyon florin caba. Of ta WEB NV ta bay haya e palo of ta NV ELMAR ta bay haya e palo. Echo ta cu un di nan entrada ta bay baha pero nan gastonan lo keda mescos pa motibo di hedging. Cuatro, e perdida di WEB NV of di NV ELMAR, lo bay wordo paga bek pa e propio pueblo di Aruba. Esaki den forma di un subida substancial den futuro y of via e medida di 8% of mas di e ABB acumulativo.  E pakico si nos sa dimes. Hasta un mucha cu ta para cara pa muraya sa cu ta sr. Eman ta hungando política populista. Manipulando e digno pueblo cu e unico meta, cu ta pa kita e pueblo su bista y comprondemento for di riba e maneho gubernamental desastroso hamas bisto den historia di país Aruba. Esaki for di tempo di e indjannan te cu e gobierno di gabinete Eman 1 y 2.  Conclusion: AINDA FALTA un mihor rebaho di coriente pa e pueblo di Aruba.

Expresionnan haci den e articulo aki no necesariamente ta refleha opinion di ArenaPoliti.co