Ya nos pais a yega na e di dos siman di conmemoracion di 30 aña di nos Status Aparte, pero te cu awe gobierno di Aruba ta den un silencio hermetico y no ta duna ningun muestra di aprecio y atencion special pa cu e logro estatal aki. Solamente den su discurso nacional Prome Ministro Mike Eman a gaña bruha lenga un rato mencionando algo di e 30 aña di Status Aparte. Por lo demas net nada mas a ser papia of haci door di e gobernantenan actual pa conmemora e hecho historico aki. Hecho ta riba 1 di januari oficialmente Aruba a bira un pais autonomo den Reino Hulandes cu su propio Gobierno, propio Parlamento, propio institutonan y mas cu tur su propio instrumentonan economico pa desaroya nos pais. Pues lo tabata na su lugar pa Gabinete Mike Eman por a mustra sikiera un tiki mas atencion y aprecio pa cu e fecha memorabel aki. Den cierto forma ta comprendibel si e negligencia aki ya cu AVP semper a pone trampa den caminda di nos Libertador Betico Croes den su lucha pa nos Status Aparte, a vota contra nos simbolonan di union y libertad, esta himno y bandera y a boycotia nos referendum consultativo.

Fechanan memorabel den 2016
Pa partido MEP aña 2016 tin un significacion memorabel ya cu den e aña aki nos ta recorda algun fecha hopi importante y historico:

1. 1 di januari: 30 aña di entrada di nos Status Aparte.
2. 15 di januari: 25 aña di fayecimento di ex-Minister di Finanzas, Guillermo Trinidad.
3. 25 di januari: Fecha natalicio di Betico Croes.
4. 9 di februari: 45 aña di Fundacion di MEP.
5. 18 di maart: 40 aña di inauguracion di nos Himno y Bandera.
6. 20 april: 25 aña di reapertura di refineria Coastal.
7. 28 augustus: 5 aña di eleccion di lider di MEP, sra. Evelyn Wever-Croes.
8. 30 october: 40 aña di aprobacion di nos ortografia etimologico.
9. 26 november: 30 aña di fayecimento di Betico Croes.
   
   

Sin duda cu e gran mayoria di e fechanan aki di un manera of otro ta relaciona cu e logro di Status Aparte y MEP. Ta pesey MEP lo bay pone enfasis riba e fecha y conmemoracionnan aki ya cu asina nos por trece e historia di e lucha estatal di Aruba den su contexto real.

Manchanan scur
Lamentablemente nos 30 aña di Status Aparte a haya un mancha scur ora cu dia 27 di augustus 2015 e autonomia financiero di nos pais a ser traiciona door di fraccion di AVP y esaki na momento cu nan a vota na fabor di e supervision financiero di CAFT pa Aruba. Tambe un otro mancha scur riba nos pais den e aña di conmemoracion di 30 aniversario di Status Aparte ta e investigacionnan relaciona cu Roberto Rincon, kende tin lazo y tratonan special cu nos gobernantenan actual y cu a pone nomber di nos pais den luz negativo internacionalmente.
Sin duda cu un y tur den e pais aki ta yega na e conclusion cu tanten cu Gabinete Mike Eman ta existi nos autonomia ta keda na peliger tur dia. Ta pesey e eleccion proximo nos lo tin e oportunidad unico pa pone un gobierno cu lo recobra e partinan di nos autonomia cu a ser perdi na man di AVP, lo exigi respet di Hulanda, trece trankilidad atrobe den nos pueblo y lo goberna na un forma transparente y cu respet pa opinion di un y tur.

Expresionnan haci den e articulo aki no necesariamente ta refleha opinion di ArenaPoliti.co