Ministernan Oduber y Schwengle a sinta cu beisbolista Melvin Mora 

Dialuna mainta Ministernan Otmar Oduber y Alex Schwengle a reuni cu e beisbolista dos biaha ganador di e All Star, Melvin Mora. E deportista famoso aki a yega di bishita nos isla den pasado caba y a mustra interes pa inversion na Aruba den cuadro di deporte y turismo.
Tambe luna pasa el a haci un donacion grando di ekipo di baseball pa promocion di e deporte aki entre nos hobennan. E reunion cu e dos ministernan tabata pa presenta un proyecto di academia di baseball combina cu turismo, proyecto cu ta mustra hopi interesante pa tanto turismo como deporte y lo por habri caminda pa un diversificacion.
Minister Otmar Oduber a indica cu e tabata un bunita presentacion di e masterplan di un compleho turistico deportivo cu ta habri un porta nobo pa un niche market pa Aruba. Cu esaki por dirigi riba e turista cu kier bin Aruba y havi e parti deportivo y di salud. Esaki lo ta combina cu un academia pa haci di Aruba un centro den henter Caribe pa atrae hobennan y cu ta crea un tipo di atraccion cu ta hopi importante, ofreciendo asina mas posibilidadnan riba nos isla.
Melvin Mora a indica cu semper e tabatin hopi interes pa Aruba y de facto el a hunga cu diferente beisbolita di Aruba. E ta bisa cu nos isla ta hopi cerca di teritorionan di peloteronan manera ta Republica Dominicana y lo ta bon pa incentiva mas ainda e parti deportivo na nos isla.
E proyecto presenta ta pa bin specialmente cu un baseball camp den un forma turistico, promocionando asina e turismo deportivo y ta mirando cu hopi interes e localidadnan den area di Pos Chikito. Pa Mora intencion no ta solamente pa incentiva e parti di baseball, pero henter e parti deportivo.
E pelotero ta bisa cu Aruba ta un pais hopi sigur unda cu Mericanonan por bin wak e peloteronan cu lo wordo forma y nos isla ta un lugar hopi strategico pasobra e ta meimei di tur cos pa loke ta e parti di Caribe. Esaki ademas cu a papia cu e hendenan di Major League Baseball y nan ta hopi interesa den expande den Caribe pa loke ta e ‘pelota profesional’.
Minister Schwengle ta wak e proyecto aki como uno hopi bunita pa tanto turismo como deporte mirando cu e ta uno cu ta sostenibel riba su mes y cu lo crea facilidadnan unda cu nos muchanan lo por haci uso di nan.
Melvin Mora ta bisa cu e proyecto aki mester ta auto sostenibel pa e por genera hopi divisa pa nos isla y pa e turistanan por tin mas actividadnan manera lo por ta un parke acuatico y disfruta di e instalacionnan deportivo cu lo wordo ofreci.
Minister Otmar Oduber ta bisa cu e proyecto aki ta uno completamente nobo, pero na mes momento algo hopi necesario, pasobra ta crea mas posibilidad y por enfoca riba un otro tipo di turismo. E tipo di turismo aki hopi biaha ta wordo haci den seno familiar, ta crea recreacion cu por ta hasta atractivo pa turistanan crucero. Un academia cu por bira un sitio central caminda por haya diferente actividad cu ta inclui e parti acuatico, deportivo y saludabel unda cu henter famia por haya algo di haci, lo ta un balor agrega pa nos isla.
E enfoke mester keda cu hobennan na Aruba, ekiponan di baseball na Aruba ta keda cu accesibilidad na e parke, segun e mandatario y e ta wordo comparti tambe pa Melvin Mora.
Minister Oduber a indica cu intencion ta cu den e 2 pa 3 simannan nos dilanti lo tin un presentacion tambe na Minister Sevinger y tambe na henter Conseho di Minister.

Expresionnan haci den e articulo aki no necesariamente ta refleha opinion di ArenaPoliti.co