Awe 25 di janauri, na ocasion di e celebracion di fecha natalicio di Tata di nos Pais, esta Betico Croes, nos lo bolbe bay tende hopi palabranan bunita di tur skina. Pa UPP, cu excepcion cu nos ta recorda e fecha importante aki di e homber grandi di nos historia, e fecha aki ta mas bien un momento pa nos por medita, reflecciona y haci compromiso serio cu nos Pais, den memoria di e Precursor di Nos Patria.

 

UPP sigur den e ultimo añanan a bin constantemente ta mustra riba e decadencia total riba tur nivel di nos comunidad y na unda cu poco poco, loke Betico Croes den felis memoria, a lucha p’e, hunto cu e Pueblo di Aruba, nos a bin ta mira cu ta wordo kibra. E ultimo aspecto sigur tabata e entrega formal di nos autonomia financiero y autoriadad di nos Parlamento pa loke ta su budgetrecht, door di e gabinete actual, sosteni pa 13 miembro di Parlamento. Tambe nos por mira e mediocridad di nos Parlamento riba su mes, e falta di democracia, e trapamento di leynan, falta di bon gobernacion y transparencia den gobernacion.

 

Puntonan importante den e pensamento y ideologia di e gran estadista y Precurso di Nos Patria, Betico Croes semper tabata  e aspectonan di honor y dignidad, libertad y democracia, igualdad y oportunidad, idealismo y union. Aspectonan cu nos ta mira cu lastimamente den e ultimo 30 añanan y particularmente e ultimo añanan a bay perdi. 

Den cuadro di pensamento aki, pa UPP, guia pa determinacion di Betico Croes, nos a mira como esencial un union nacional pa por enfrenta e problemanan serio cu nos Pais ta enfrantando. Pesey constantemente, desde e famoso “welga di hamber” di 2014, UPP a persisti pa yega na un conseso nacional, pa asina nos enfrenta nos mesun problemanan y enfrenta Hulanda cu su intencion di metemento, ya cu nan tambe tin culpa di e situacion di unda nos ta awe aden. 

Lamentablemente no a existi ni e vision ni e curashi pa nos por yega na puntonan di salida comun den e mundo politico aki na Aruba. Ni na 2014 ni na 2015 na momento cu UPP a bolbe haci e intento. 

 

E aspectonan importante ariba menciona cu ta puntonan determinante den e idealismo y pensamento di Betico, ta puntonan cu semper ta keda valido. Apesar cu Betico no tey mas, su pensamentonan ta keda bibo. Nos ta sigur cu hustamente e aspectonan aki, si Betico tabata na bida awe, e lo a manda e mensahe cu nos a desperdecia 30 aña di Status Aparte, dor di no a fortifica e fundeshi y pilarnan di nos Pais. Aki nos por pensa den nos Trias Politica, nos finanzas publico, nos Parlamento, nos estado di derecho y nos autonomia.

E trabou di Betico tabata esun di un architecto y construtor di nos Pais. E ta esun, hunto cu su generacion y e Pueblo a pone e fundeshi di nos Pais. En berdad den 30 aña nos a traha un cas, pero cu no ta cuadra e criterionan basico di construccion constitucional. Nos no a percura pa mehora loke nos a haya na 1986, sino mas bien nos a mantene y si nos scucha nos actornan politico principal di awendia, parce cu nos no ta cla pa haci e cambionan aki, sino di mas bien mantene un status quo, y pone pueblo kere, cu ta simplemente nos mester confia den capacidad, intencion, integridad y bondad di actornan politico. 

 

UPP a presenta, puntonan esencial, tin di nan ideanan propio, otronan adopta y/of adapta di otronan, pa asina termina cu un era cu ya a bira obsoleto. Pero aparentemente ta opta pa un status quo, cu defacto nifica atraso. 

Pa nos garantisa e honor y dignidad, libertad y democracia, igualdad y oportunidad, idealismo y union cu Betico semper a propaga, ta necesario pa nos acepta den e momentonan reflectivo aki, pa compromete nos mes pa e cambio necesario. Cambionan fundamental y esencial pa purba na rescata nos Trias Politica, nos autonomia y nos estado di derecho.

 

Cu esaki UPP, uzando Dia di Betico, como momento di refleccion, ta spera di por contribui na un concientisacion, cu ta necesario pa yega na un Compromiso Nacional, pa nos por logra na conserva e herencia cu Betico a laga pa nos, esta Aruba como un Pais liber y na unda cu tin felicidad pa nos Pueblo.

Feliz Dia di Betico.

 

 

Partido UPP

Booshi Wever

25 januari 2016