Evelyn Wever-Croes (MEP): “Presupuesto ta desbalancea: hancho pa e ministernan y smal pa pueblo”
PRESUPUESTO 2016 TA WORDO TRATA DEN PARLAMENTO
"Parlamento e siman aki ta continua cu tratamento di presupuesto pa 2016. E prome tanda a tuma 4 dia y awor ta bin e di dos tanda. E presupuesto ta hopi laat entrega, y sin ningun hustificacion. No tin ningun motibo pa cual gobierno por a entrega esaki asina laat.Pero awor kier rush e parlamentarionan pa hasi liher.
E problema mas grandi cu nos tin cu e presupuesto ta cu e ta desbalancea: hancho pa ministernan y nan coordinadornan, pero smal pa pueblo.
Pa mi duna algun ehempel: gastonan di gobierno a subi cu 9 miyon, pero a corta den gastonan di husticia cu 3 miyon florin. Net husticia cu mester mas inversion pa hasi Aruba mas sigur. Gastonan di huurmento di edificio a subi cu casi 2 miyon florin; gastonan di abogado a subi cu 1.3 miyon florin; gasto di propaganda a subi cu 1 miyon florin y gastonan di biahamento a subi cu 350 mil florin. Pa coordinadornan ta paga 39 miyon florin.
Pero pa fundacionnan cu ta depende di subsidio si bo tin mucho placa ta wordo aloca. Especialmente despues cu a corta e subsidionan na 2013, nunca mas a re-aloca e placa ey.
Pesey nos ta bisa, hancho pa ministernan y smal pa pueblo. Esaki ta un abuso"
segun lider di MEP, Evelyn Wever-Croes
ABB
"Riba dje ainda gobierno ta contemplando introduccion di e ABB di 7% pa cobra 50 miyon florin adicional. Nos ta contra esey pasobra tin otro alternativva. Facilmente bo ta logra yega na e 50 miyon ey: stap 1 baha cantidad di minister di 9 pa 7 bek y bo ta scapa 17 miyon florin. Stap 2: baha e cantidad di coordinadornan: 24 miyon. Stap 3: biaha y fiesta menos: 9 miyon. Total bo ta scapa 50 miyon florin y bo no mester bin cu e ABB. E ABB mester bin solamente si Mike Eman y su ministernan kier sigi fiesta, biaha y yuda nan campanjadornan, y ta lubida di e pueblo" lider di MEP a declara.
Expresionnan haci den e articulo aki no necesariamente ta refleha opinion di ArenaPoliti.co