ORANJESTAD: Durante conferencia di prensa semanal di partido MEP, Parlamentario sr. Guillfred Besaril a reacciona riba e atakenan recien di Minister di Husticia dirigi na su persona y na otro miembronan di fraccion di MEP.

Parlamentario Besaril a inicia su reaccion bisando cu: "Nos di fraccion di MEP lo keda al caso y enfocando riba hechos. Si e mandatario ta scoge pa hunga politikeria y tira cu lodo, esey ta su problema! Nos tey den Parlamento pa controla trabou di Gobierno, y si e Minister no ta gusta tende su berdad, esey ta bisa mas di dje cu e ta bisa algo di nos Fraccion!"

Loke a sosode siman pasa, caminda preso a scapa di KIA ta un refleho bibo di e maneho den Husticia. E mandatario di Husticia ta na haltura cu tin un cantidad di problema serio den KIA. E mes a apunta un directora nobo kende despues di algun siman di no a haya e coöperacion di e Minister, a tuma e decision di entraga su retiro y bolbe bek den su funcion den Cuerpo Policial. Ta obvio cu e mandatario di Husticia no ta gusta ricibi critica y ta opta pa tira cu lodo y ataca miembronan di fraccion di MEP den un forma personal.

"Si como Parlamentario mi expresa mi preocupacion riba e informenan anual incompleto cu e Minister a presenta den Staten di Ministerio Publico (OM), no mester mira e hecho aki como un atake directo riba e trabou cu OM ta desplega. Mester mire pa loke e ta, esta un reclamo di e maneho di e Minister na permiti cu a tarda pa publica e informenan - pues falta di transparencia - y di no a brinda OM e sosten necesario pa e contenido di e informenan ta na e mesun nivel cu di e otro partnernan den Reino! Por cierto e accion aki no solamente ta mi derecho como Parlamentario, sino mas bien e obligacion cu mi tin como representante di Pueblo den Parlamento".

Segun Parlamentario Besaril, e Minister di Husticia ta trata un biaha mas di tira santo den wowo di Pueblo insinuando cu integrantenan di fraccion di MEP ta critica Cuerpo Policial di no ta traha optimalmente. "Ningun momento mi a critica Cuerpo Policial (KPA). Danki na KPA mi tabata tin e honor di a sirbi nos comunidad pa mas di 20 ana. Mas bien semper mi a elogia con apesar di e falta di maneho di Minister di Husticia y muy apesar di e falta di recursonan enorme den KPA, tog nan ta keda haci nan maximo esfuerzo pa desplega nan trabou cu dignidad y na bienestar di comunidad!"

"Na e momento aki nos por mira cu criminalidad ta "Out of Control" y tin un solo culpabel pa esaki, esta e Minister di Husticia actual. Ta p'esey na mas di un ocasion fraccion di MEP a trece padilanti di no tin confiansa mas den e Minister y a urgi Minister President, sr. Eman, pa asumi su responsabilidad y haci e cambio necesario na bienestar di nos Pais, ya cu na final di dia ta su persona ta na cabes di e Gobierno aki!"

Expresionnan haci den e articulo aki no necesariamente ta refleha opinion di ArenaPoliti.co