MEP a tuma nota di e declaracion di minister Otmar Oduber cu segun e, e STRAWBERRY GATE, ta keda pa pasado. Pero e minister ta lubida cu e tin hopi splicacion pa duna pueblo ainda. 

KIKO TABATA STRAWBERRY GATE? 
Dia 8 november 2010 e “strawberry-gate” a cuminsa ora minister Otmar Oduber a firma un MOU cu e criminal mas peligroso na Aruba Johannes Span Ospino pa ‘supuestamente’ planta strawberry na Aruba.   Pa esaki  Otmar Oduber a duna orden pa paga PER DIRECT, na Span Ospino 11 mil dollar. Sinembargo e placa a wordo paga, pero ningun strawberry a wordo planta.  Span Ospino ta wordo considera e criminal mas peligroso na Aruba ora el’a wordo deteni pa atraconan cu arma pisa. Span Ospino ta un bon conocir di Otmar Oduber y tabata envolucra den campanja electoral di AVP y di Otmar Oduber.

Otmar Oduber a sali defende su mes na forma masha emocional e tempo ey, tipico un reaccion di un hende cu a wordo gara ta ganja. MEP a demostra cu Otmar Oduber a ganja por lo menos 3 biaha den su reaccionnan. E minister a laga sa cu e no a firma e M.O.U. cu Span Ospino, sinembargo e prueba ta palpable cu ta firma di Otmar Oduber tin riba e M.O.U. y ta wordo publica akinan atrobe. No di un “tal Otmar” sino di e minister mes!

E minister a declara cu e no tabata sa ken Span Ospino ta y cu e no tabata sa di su antecedente criminal. E minister tabata sa masha bon ken e persona ta, y ademas cu un simple buskeda den “google” e por a haya sa di tur su antecedentenan criminal. Tabata su deber pa percura pa no pone cara di nos pais na berguensa asina.

Otmar Oduber a declara tambe cu no ta Span Ospino a ricibi e placa, sino cu e placa a bai pa e compania cu e tabata representa. Pero MEP a publica prueba cu ta Span Ospino mes a cobra e placa ya caba un luna despues di firma e M.O.U., siendo cu tur hende mester warda normalmente 3 luna pa haya nan pago.

Te dia di awe Otmar Oduber no a sali y splica su envolvimento cu Span Ospino, ni tampoco unda e placa a bai.

AINDA FALTA ....
Si minister Otmar Oduber kiermeen cu e no a hasi ningun acto criminal, ainda e falta di duna hopi splicacion si pa pueblo. Pasobra cu Ministerio Publico no kier persigi’e, no ta nada stranjo. Pero Otmar Oduber no por kere cu e cos a caba akinan. Otmar Oduber ainda falta pa duna cuenta na pueblo kiko su relacion ta cu sr. Ospino Span y dicon el’a pone presion riba Santa Rosa pa paga sr. Ospino mesora, sin warda siquiera un mata di strawberry wordo planta. Pasobra un cos ta sigur, mientras cu e minister a privilegia su amigo, pueblo a paga 11 mil dollar y ken sa cuanto mas, y ningun dia un strawberry a wordo planta na Aruba!

Y si Otmar Oduber ta bolbe pensa di ripiti cu 11 mil dollar ta un suma hopi abou, pensa dos biaha cuanto famia no tin ni 10% di e suma ey! Ta placa di pueblo y e mester duna cuenta na pueblo. Tribunal penal no kier actua, pero tribunal di pueblo si!

Expresionnan haci den e articulo aki no necesariamente ta refleha opinion di ArenaPoliti.co