Partido Democracia Real a yama su conferencia semanal di prensa diamars, y a cuminsa pa bisa cu mester bin un reunion urgente den Parlamento, referente na Salud Publico. 

El a bisa di a tuma nota di diferente reclamo cu ta yega na su fraccion y por a mira cu siman pasa tabata tin un protesta door di problemanan den salud publico. Pa varios tempo caba PDR a bin ta senjalando cu cierto aspectonan no ta andando manera mester riba tereno di salud. 

Bikker a bisa cu nos pais ta un di e uniconan na mundo cu un gran parti di e turnover tax, cu nos conoce como “BBO-BAZV, ta bay netamente na AZV y esaki ta 2% y 3.5%. Asina mes semanalmente diferente di hende na Aruba ta fia placa na un of otro lugar, pa bay busca nan salud den exterior. 

E kier sa di e minister di salud di con esaki ta tumando lugar? Un pregunta aki ta varios biaha el  a haci caba  na e ministernan di Salud cu den e delaster siete anja di gobernacion ta dos tabata tin. Un cu tabata modela y esun actual cu den concepto di PDR no ta dunando e atencion cu salubridad publico merece.

Entre otro, mas cu dos anja pasa a bin cu un ley di reconocimento di diploma di esnan cu ta studia medicina den nos region, y e ley ta uno cu ta duna espacio na e minister pa duna contenido na dje via decretonan pero te dia di awe no tin un decreto cu a yega Parlamento, pa ehecuta e ley akinan. Bikker a bisa cu e pregunta na minister ta e ora ey si un ley a wordo pasa, pero gobierno no ta dune contenido, anto kico ta pasando?

Otro cos ta cu te unda PDR sa, no tin un inspector di Salubridad Publico, anto varios persona ta haya nan mes cu kehonan legitimo pa loke ta trata e cuido cu nan ta haya, of pa falta di dje, y nan no tin un caminda di bay. Tin hende cu ta entrega keho pa procedure na e  na Hospital, pero hopi biaha nan no ta haya un reaccion debido pa esaki.

Pues tin hopi frustracion den nos pueblo encuanto nivel di cuido di salud, Bikker a bisa, y PDR manera semper kier ta constructivo y a pidi pa bin hunto den un reunion na Parlamento, pa intercambia di idea, wak kico ta pasando y purba mehora e situacion aki.

E parlamentario a wak un editorial cu ta duna cierto sugerencianan pa e mehoracion di e organizacion di salubridad publico, y tin di nan cu ta make sense. Por ehemplo e pregunta di con un persona mester cana rond cu un verwijsbrief bao su braza, siendo cu nos tin un mundo completamente digital na 2016 y tur hende tin un app.

E ta haya cu ta un sugerencia hopi bon mes, cu ora un persona tin cu bay un specialista of un fisioterapista, pa electronicamente e verwijsbrief ta bay di manera cu e persona ey por yega na su specialista, fisioterapista etc., of unda e ta wordo referi y e verwijsbrief tey cerca e specialista caba. Asina e tempo di spera tambe ta baha, por atende e pacient den real time y por haci un miho planning.

Expresionnan haci den e articulo aki no necesariamente ta refleha opinion di ArenaPoliti.co