‘A horta na su cas, a detene y a confisca su vehiculonan’

‘Trio a horta tas for di beach’

‘Ladronnan a dal cacho y bay cu herment for di cas bao di construccion’

‘Ladronnan a drenta den cas bao di construccion’

‘Cas na Wayaca a haya bishita di Ladron’

‘Bisiña ta topa ladron ta ranca na bentana di cas’

‘Airco di Mary Joan Foundation a wordo horta’

E titulonan aki, ta djis un seleccion di e articulonan cu a sali publica riba UN DIA, siman pasa. Si nos pone acerca tur e otro noticia di atraco y ladronicia cu a sali durante e siman ey of esunnan cu no a wordo publica of cu no a wordo denuncia, anto e lista lo bira hopi mas largo. Esaki mester ta un ‘wake up call’ pa tur hende mira cu e situacion di insiguridad riba e isla, ta alarmante. Pa nos no lubida cu awendia casi tur atraco ta cu armanan, curpanan ta wordo haya ‘decapita’ y kima, placa ta wordo horta for di cas di polis y hasta polisnan ta wordo asalta na bancomatico. Pero sin informacion y cifranan concreto, e ta keda na solo ‘un percepcion’, manera e minister di Husticia a yega di bisa. Pero e realidad, ta bisa otro.

Riba e portal di ministerio publico, no tin ningun informacion riba e situacion di siguridad di Aruba. E ultimo informacion riba e portal aki ta di 26 juni 2015 (www.omaruba.aw). Tristo pa mira cu si na e islanan BES, e ciudadano por haya mira e relato anual di e ministerio publico pa haya sa exacto kico a wordo haci riba e tereno di siguridad. Aki na Aruba, e unico informacion cu un ciudadano por haya riba e situacion di siguridad, ta di Banco Central, y solamente di e añanan 2002 te 2010. Na 2002, e cantidad di crimen cometi tabata 6412 y na 2010, e la crece bay te na 8266 (Annual Statistical Digest 2014). A pesar cu e cifranan ta bieu, nan ta duna e impresion cu e criminalidad ta aumentando. Dicon gobierno a stop di publica e informacion aki, ta keda un misterio. Kisas publicacion di e informacion aki, lo confirma cu ta gobierno mes ta esun responsabel y cu e ta forma parti di su plan di destruccion?

E ta un hecho cu ora no tin suficiente cuponan di trabou, pero si e cantidad di trahado disponibel ta crece, e desempleo y e problemanan social tambe lo crece. Diferente gobierno a sconde e desempleo creciente, cu e creacion di cuponan di trabou den of rond di gobierno. E practica aki no a baha e desempleo real. Esaki solamente a aumenta e gastonan publico.

Awendia, hopi trabou ta wordo haci di un forma clandestino y lamentablemente pa hopi migrantenan pa un sueldo hopi abou. Consecuencia di esaki, ta cu mas hende ta kedando sin trabou y tin mas abuso ta tumando luga cu e trahado. Hasta bou di e migrantenan cu a bin biba akinan 20 aña pasa, e desempleo ta halto y awor nan tambe ta keha. Awendia, no tin trabou structural y permanente pa ningun hende. Awendia momento cu un persona yega 35 aña, e ta bieu y no tin trabou pe. Kico tur e hendenan aki, sin trabou, tin cu haci? Kico nos hobennan tin cu haci?

Hopi hende awendia ta traha djis pa paga gastonan. Nan no tin e luho pa cumpra nada pa nan mes mas. Otronan ta sin trabou y tampoco nan tin e speransa cu nan lo haya un trabou. Pero mientrastanto, e gobierno ta sigui laga mas hende drenta e isla aki, pa simplemente motibonan populista, politico y di interes propio.

E ta un hecho cu ora no tin suficiente cuminda of trabou, algun hende ta busca empleo den crimen y ladronicia. Tambe entre e migrantenan, tin hende cu menos bon intencion of cu un pasado criminal. E no ta un secreto publico cu na nan pais, e criminalidad ta halto, violento y matamento a bira normal. E no ta pa nada cu tur cas y edificio na e paisnan ey, tin siguridad priva, camara y ‘rejas de hierro’ dilanti tur porta, bentana y dak. Pues nos no tin cu gaña nos mes of haci manera nos no sa for di cua skina e criminalidad violento creciente ta biniendo.

Pero asina mes, cada dia nos gobierno ta laga un monton di hende drenta Aruba pa ‘traha’, legal of ilegal. E no ta importa nos gobernantenan mes cu e baca a hoga caba y cu nan a destrui e sociedad Arubano. Pasobra gobierno tin su mashin di campaña y indoctrinacion y awendia ta e migrantenan nobo ta e sostenedonan principal di e ‘Don ministernan’. Nos no tin cu wak hopi leu, pa mira con un clase politico tradicional a dividi, horta y destrui un pais. Na e pais bisiña, tin un desempleo halto, un criminalidad halto y violento, un pobresa structural, scarsedad di tur cos y un exodo masal di hende pa nos isla. Wel, parce cu nos gobierno kier haci mescos cu Aruba.

Conclusion:

Ta nos gobierno ta esun responsabel pa e criminalidad y insiguridad creciente. Ta nos gobernantenan ‘a let them loose’ riba e pueblo aki pa intimida, destrui, horta y tuma e isla aki over!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co