Nos a tuma nota di un comunicado di prensa di sr Baba Herde den cual e ta tilda MEP di ta descredita IMF y di ta bisa ta ken IMF ta pa tuma lugar di CFT di Hulanda. Asina aki atrobe sr. Herde ta recuri na mentira y ta purba bruha tera pa por sconde AVP su propio berdad. Ta notabel cu awor cu AVP tin precion di Hulanda pa supervicion financiero door di CFT diripiente IMF a haya un balor agrega pa AVP. Esaki ta remarcabel ya cu na 2010 y 2013 IMF no tabata importante pa AVP y awe kier use como salbabida pa keda na poder.

Na 2010 caba IMF a adverti Gabinete Eman cu e ‘move’ di corta den BBO lo causa un desaster y pesey a conseha pa traha riba un belasting indirecto nobo pa reemplaza e BBO. Como cu lo dura dos aña pa hinca un belasting asina den otro y como cu 2013 ta aña di eleccion Gabinete Eman no a haci nada. Ta dicon sr Herde y e Fraccion di AVP no a duna importancia na e recomendacion aki di IMF? Dicon awe si recomendacion di IMF ta bon y na 2010 si IMF no tabata bon?

Na 2013 IMF a traha un rapport devastador contra e gobernacion di Gabinete Eman. E rapport a keda cla na juni 2013 pero como cu ta aña di eleccion Gabinete Eman a sconde e rapport te ora cu bou precion di opocicion y Hulanda nan a publike na augustus 2013. Ta dicon e tempo ey sr Herde y e Fraccion di AVP a consenti pa Gabinete Eman sconde e rapport di IMF pa Pueblo? Acaso e tempo ey e informacion di IMF no tabata bon? E tempo ey AVP a bisa cu e recomendacionnan di IMF ta djies un conseho y no mester tuma nan, ya cu Paisnan cu a tuma conseho di IMF no a bay bon. Ta dicon awe si conseho di IMF ta asina imperativo pa AVP?

Tur esaki ta pasobra awe Gabinete Eman ta bou precion enorme di Hulanda pa haci e supervicion financiero door di CFT. Specialmente despues cu Minister Eman mes a firma pa supervicion di CFT na 2013 den e Protocol di Diahuebs Santo y cu ex Minister Yrausquin a firma ‘geen bezwaar’ pa tur e condicionnan di Conseho di Minister di Reino na februari 2014. Pero como cu AVP awe no por bende e realidad aki cu Pueblo, awor kier usa IMF y su consehonan pa un fiscal council como salbabida pa no perde cara politico y pa keda na poder. Esaki ta e berdad cu sr Herde y e Fraccion di AVP no por bisa y enves di esaki ta purba bruha tera y tilda MEP di ta descredita IMF pa tapa e barbaridad di su propio partido.

Pueblo di Aruba lo tabata mas beneficia si sr. Herde y Fraccion di AVP por a asumi nan responsabilidad di por ta mas sincero y stop cu tanto malinformacion, bruhamento di tera y mentira den direccion di nos Pueblo. Ta bisto cu na 2010 y 2013 IMF no tabata importante pa AVP pero awe kier use como salbadida pa scapa cara politico y sconde e berdad pa asina por keda na mando.


9 december 2014

Expresionnan haci den e articulo aki no necesariamente ta refleha opinion di ArenaPoliti.co