Den su discurso na fin di aña 2014, Prome Minister Mike Eman a reitera e importancia cu Reino tin pa Aruba. E historia cu Aruba tin cu Reino ta uno hopi largo y e aña aki Aruba ta celebra su di 30 aña di Status Aparte como parti integral Reino Hulandes. Desaroyo y relacionnan den Reino a pasa den temponan bon y menos bon, pero si compara e desaroyo Socio-Economico di paisnan den Reino Hulandes, cu otro paisnan den nos region, e ta hopi cla cu Reino Hulandes tabata algo bon pa nos pais.

“Pa nos historia largo hunto, pa nos cooperacion riba nivel di defensa, relacionnan exterior, pa mantene nos estado di derecho, nos nacionalidad y proteccion di nos integridad teritorial,” Prome Minister a reitera e importancia di Reino, pero Reino na e momentonan aki tambe ta hopi importante pa desaroya e potencialnan di cooperacion economico entre Aruba, den Caribe y Hulanda den continente Europeo. “Pa realisa un economia mas amplio y mas berde, nos por haci bon uzo di e conocemento, ideanan, influencia y cooperacion cu bentaha mutuo den Reino pa cada partner hunto por realisa algo mas grandi pa cada un di nos pueblonan.”

Desaroyando Aruba den un hub entre continentenan Latino Americano y Europeo ta un vision cu tin partinan concreto caba desaroya. E situacion di win-win aki ta algo cu Gabinete Mike Eman a bin ta traha riba dje pa por diversifica y amplia e base economico di pais Aruba. Desaroyonan economico den Latino America ta bay ta uno hopi grandi den e añanan nos dilanti y companianan Hulandes y particularmente Europeo kier ta parti di e desaroyo gigantesco aki. Pa haci esaki mas efectivo cu ta posibel companianan Europeo mester un hub pa nan por maneha nan negoshinan leu for di nan sedenan na Europa. Aruba tin un pueblo bon educa y cu tin dominio di idiomanan cu ta uza den tur dos continente. Nos ciudadanonan tin afinidad pa e cultura Latino Americano, pero tambe pa esun Europeo. E leynan cu tin na Aruba ta basa riba e sistema Hulandes cu tin masha respet internacionalmente. Tur esaki ta pone cu awendia tin desaroyonan caba cu ta mustrando e interes di companianan grandi pa establece nan mes na Aruba.

Ehempelnan tin varios, e instituto di investigacion di tecnologia y ciencia aplica di Hulanda, TNO, a establece su mes na Aruba caba. Un ehempel importante di con e pilar economico aki, birando mas fuerte, por crea mas empleo pa nos profesionalnan hoben.

Otro ehempelnan ta Scheepvaartschool Rotterdam (STC) cu ya caba a inicia un proyecto-piloto caminda cu ta entrena cursistanan Latinoamericano den e arte di nabegacion na Aruba mes, pero cu e diploma reconoci, manera e esun Hulandes. Rietveld Academie ta un academia di arte di taya sumamente halto na Europa y rond mundo. For di Latino America tur aña tin studiantenan ta biaha pa Hulanda pa studia na e instituto aki. Rietveld ta kere cu estableciendo su mes na Aruba por haci e drempel pa biaha pa Hulanda un poco menos y na e mesun momento amplia e cantidad di studiantenan cu por tin acceso na e experticio di e academia renombra aki.

“Empresanan for di Hulanda, for di Europa por haci Aruba e punto di conexion cu Latino America y Centro America. Nos ta trahando estrechamente cu Gobierno Hulandes pa haci Aruba e centro caminda Europa ta topa America.”

E conferencianan ‘Europe meets the Americas’ y ‘Green Aruba’ tabata piesanan importante pa desaroya e vision aki. Cu Waf di Barcadera den pleno construccion, y cu na final di 2015 ta drenta den operacion, Gabinete Mike Eman ta pone un pida mas di e puzzel cu ta haci di Aruba un opcion atractivo pa companianan Europeo por haci negoshi cu Latino America haciendo uzo di Aruba como un hub comercial.

Prome Minister a enfatisa den su discurso cu, “Reino tin sentido. E ta di balor grandi pa cada un di nos.”

Expresionnan haci den e articulo aki no necesariamente ta refleha opinion di ArenaPoliti.co