Na 2014 GE II a ricibi un Koninklijk Besluit (KB) y Aanwijzing for di e Rey di Hulanda pa mal maneho riba fondonan publico cu ta nada otro cu malgobernacion di GE I y II. MinPres Mike Eman a purba tapa e realidad aki pa nos pueblo den e aña di eleccion 2013, pero door di presion di Den Haag mester a publica e rapport di International Monetary Fund (IMF) di Mei 2013. Ordo a wordo duna pa bisa pueblo e berdad prome cu eleccion di September 2013. Movimiento Electoral di Pueblo a tuma e rapport aki na serio y a campaña den tur skina di nos pais pa trece e informacion aki na conocemento di nos gran pueblo. Nos di MEP a lucha contra e forsa di capital/interes special y algun medio di prensa cu ta comprometi, algo hamas bisto den nos historia como un pais autonomo. Nos mensahe no a yega pueblo pa varios motibo, e.o  fraude kiezersbedrog y clientelismo.

Presupuesto 2017
Desde 2009 te cu 2017 tur presupuesto tawata un desorden total di Mike y su gobierno. Aunke cu  gobierno a bin cu e cuenta anual, tur cos riba maneho financiero y transparencia ta un desorden total. Tur aña a sigui aumenta nos debe cu presupuestonan supletorio. Den apenas 5 aña AVP a conoce tres (3) Minister di Financia algo hamas bisto den nos pais. E dificit di 0.5% pa 2017 ta net pa un otro KB no wordo imponi pa Den Haag kitando por completo nos Autonomia. Esaki ta refleha e clientelismo na 26.6 Miyon florin. Esaki ta e grupito di AVP cu ta yama radio tur dia/social media y ta defende un gobierno cu no tin derecho di existencia desde 2013 ora cu nan a redobla nos debe nacional den apenas 4 aña. Tur parlamentario di AVP a vota CONTRA reapertura di nos Refineria na 2014 y 2015. Awo e mesun Gobierno aki ta depende di 124 Miyon florin di e refineria cu Raad van Advies ta considera mucho optimista. Si no tawata pa CFT (Curatela) imponi riba GE II, Mike Eman lo a sigui endeuda nos pueblo cu proyectonan PPP. E aña aki nos tin cu paga 6 Miyon na renobacion/ampliacion di nos Hospital y 9 Miyon pa  e Green Corridor. Pues MinPres Mike Eman a mustra cu e no ta capaz di goberna Aruba na un manera responsabel. E kier a sigui cu mas PPP pa haci gobernacion di MEP entre 2017-2021 basicamente IMPOSIBEL y destrui nos Status Aparte y derecho di Autodeterminacion.

Clientelismo
Mike y AVP ta keda cumpra voto (Clientelismo) pasobra gastonan di personal di gobierno ta sigui AUMENTA. E Minister encarga cu turismo, Otmar Oduber a falta respet total pa RvA y a bisa cu AHATA a soborna nos Minister President hibando nos Democracia den peliger despues cu e meneer aki no ta entrega su cifranan y pronostico di e famoso ATA Bank. Esaki ta muestra di e falta di capacidad di GE II y pueblo mester rechasa e desaroyo negativo aki totalmente. No a entrega rapport di SVB, APFA, ELMAR, WEB, SETAR, SERLIMAR, pues basicamente tur nos companianan estatal ta den problema door di GE I y II. Anto asina mes Sr. Eman ta organisa un di siete (7) Green Conference mustrando pueblo cu e no tin respet pa e dolornan di nos digno pueblo. E fiesta riba custia di nos pueblo a yega su fin anto nos pueblo mester mobilisa e lunanan nos dilanti pa salba e tiki cu a resta di nos pais. Nos a bay 40 aña atras den apenas 8 aña di gobernacion di Mike Eman y AVP. Ta tempo pa manda e gobierno aki cas y pa nan no bolbe nunca mas den gobernacion di nos baranca tan stima.

Expresionnan haci den e articulo aki no necesariamente ta refleha opinion di ArenaPoliti.co