Un otro logro den e lucha pa nos Status Aparte: 

Despues cu den e aña aki nos a recorda caba tres fecha historico relata na otro, esta 30 aña di nos Status Aparte (1-1-1986), 45 aña di fundacion di MEP (9-2-1971) y 40 aña di inauguracion di nos Himno y Bandera (18-3-1976), diadomingo awor 30 di oktober 2016 nos ta recorda cu 40 aña pasa Parlamento di Aruba a aproba e ortografia tradicional di nos pais. Tabata riba iniciativa y vision di nos Libertador Betico Croes kende den su lucha pa Status Aparte a sinti e necesidad pa bin cu un propio ortografia oficial pa Aruba, cu Gobierno di Teritorio Insular di Aruba a instala un Comision di Ortografia dia 5 di mei 1976, cu e meta di formula y recomenda un ortografia na gobierno. E comision aki tabata bao di presidencia di sr. Jossy Mansur. E otro miembronan tabata sra. Ofelia Paris, sr. Hubert Booi, sr. Holmo Henriquez, sr. Thomas Ruiz, sr. Julio Maduro, sr. August Croes y sr. Salomon Fingal. Como secretario a fungi sr. Juan Thijsen. E comision den forma diligente a cuminsa haci nan trabao y ya dia 13 di september 1976 nan a entrega nan recomendacionnan na Gobiero di Aruba. Dia 30 di october 1976 Parlamento di Aruba a aproba e ortografia recomenda pa e comision aki. E recomendacion tabata e ortografia etimologico cu ta cuadra completamente cu nos identidad, tradicion y nos cultura. Cu e logro historico aki Betico Croes y MEP a percura un biaha mas pa salvaguardia otro tradicion cultural di nos pueblo. Pero esaki no a keda te ey ya cu tabata hustamente un gobierno di MEP mes cu a percura dia 21 di mei 2003 pa Papiamento bira e idioma oficial di Aruba banda di e idioma Hulandes. 

Pabien pueblo di Aruba cu e logro di nos Papiamento etimologico y laga nos tur percura pa sigui papia y skirbi e idioma aki den forma corecto manera semper tabata e deseo di nos Libertador.

Expresionnan haci den e articulo aki no necesariamente ta refleha opinion di ArenaPoliti.co